Qashqadaryo viloyati Qarshi tumani “Tinchlik” mahalla fuqarolar yig‘ini Parmiton qishlog‘ida yashovchi aholi o‘z uylariga kirib-chiqish uchun qabriston oralab yurishga majbur bo‘lmoqda. Bunday holat mahalla aholisi foydalanib kelgan yo‘l bir fuqaroga uy qurish uchun berib yuborilgani sabab yuzaga kelgan, deya xabar bermoqda “Daryo” muxbiri.
Parmitonning muammoli qismida 2011-yildan uylar qurila boshlangan, 2019-yili esa qishloq aholisi foydalanib kelgan yo‘l ustiga, mahalliy mas’ullar ruxsati bilan, yana bir hovli tushgan. Shundan beri aholi qabriston orqali yurishga majbur.
“Mayli, o‘sha payt hokimlik fuqaroni o‘ylab, yo‘l ustidan ham uy qurishga ruxsat bergandir. Ammo bizga ham yo‘l ochib berishi kerak-ku, to‘g‘rimi?”, — deya savol qo‘yadi parmitonlik G‘olib Qilichev. Uning so‘zlariga ko‘ra, hududdagi 30 xonadonning 150—200 chog‘li aholisi kechayu kunduz qabriston oralab uyiga kirib-chiqadi.
“Bolalarimiz maktabga boradigan paytda qabristonga mayit kelib qolishi bor -- yosh bola mayit turgan yerdan o‘tadi. Ular bundan qo‘rqmaydi, yo seskanib biror kasallik yuqtirib olmaydi, deb kim kafolat bera oladi? Hech kim”, -- deydi Dilbar To‘rayeva. Homilador kelinlaridan xavotirlanayotgan onaxonlar ham kam emas.
Eng qizig‘i, qishloqqa chaqirilgan tez yordam, suv tashuvchi mashina va hatto o‘t o‘chirish mashinasi ham qabriston o‘rtasidan o‘tgan shu kichik yo‘ldan yurishga majbur. “Tez yordam mashinasi ba’zan mahallaga kirishni ham xohlamaydi, taksilarni-ku gapirmasa ham bo‘ladi -- qabriston oralab yurmayman deb, ichkari kirmaydi”, — deydi aholi.
“Tinchlik” mahallasi raisi Samandar Sattorov parmitonliklarning shikoyati o‘rinli ekanini tasdiqlarkan, o‘zi viloyat Arxitektura boshqarmasiga, tuman arxitektura mas’ullariga xat chiqarganini ma’lum qildi. “Shu muammo hal bo‘lsa, ko‘nglim xotirjam bo‘lardi”, -- deydi rais. Biroq, ikki oy o‘tsa hamki, biror javob bo‘lgani yo‘q.
Parmitonliklarning tan olishicha, dastlabki shikoyatlardan so‘ng rasmiylar “yo‘l ochib berdik” deya 2 kilometr uzoqlikdagi sovxoz yo‘lidan foydalanishni taklif qilgan, biroq bu yo‘ldan hech kim foydalanmaydi -- u uzoq, noqulay, qishda loyligidan yurib bo‘lmaydi. “Biz 2 kilometr naridagi yo‘ldan emas, 20—30 metr yurib, mahalla boshidagi asfalt yo‘ldan yurishni xohlaymiz”, — deydi Buvish G‘o‘chchiyeva.
Aholi yo‘lsizlikdan ham avval aynan mas’ullar beparvoligidan ko‘proq charchagan. “Muammomizga sal e’tibor qaratib, qabriston darvozasini ichkariga ko‘chirishsa, olam guliston. Qabriston darvozasi ichkariga kirsa, alohida yo‘l uchun yer ochiladi. Mayli, o‘sha yo‘lni ta’mirlash ishlarini ham o‘zimiz bajaramiz, faqat yo‘l ochib berishsin, shuning o‘zi yetarli”, — dedi parmitonliklar.
Izoh (0)