Qashqadaryo viloyatining Yakkabog‘ tumanida “Elmurod bloger” taxallusi ostida faoliyat yurituvchi bloger Elmurod Odilovdan tuman IIB tushuntirish xati oldi. Blogerning ta’kidlashicha, bunga tuman hokimi Lutfiddin Abdullayev va uning o‘rinbosarlari tomonidan qilingan shikoyat sabab bo‘lgan.
Ma’lum bo‘lishicha, tuman IIB tergovchisi Dilshod Poyonov bloger bilan bog‘lanib, uning ustidan tuman hokimligi shikoyat qilgani, hokimlik vakillari blogerni tuman hokimi Lutfiddin Abdullayevni obro‘sizlantirishda ayblayotganini ma’lum qilgan.
“Xatda Elmurod bloger har xil yolg‘on ma’lumotlar tarqatib, tuman hokimini obro‘sizlantirgan deyapti. Konstitutsiyaviy tuzumga, davlat hokimiyatiga qarshi salbiy holatlarni tarqatishi tuman hokimligini obro‘sizlantirmoqda deyapti. Tuman hokimining barcha o‘rinbosarlari ko‘rsatma bergan, Elmurod blogerga bunday ma’lumotlar bermaganmiz deyapti. Shuning uchun bir kelib ketishingiz kerak. Sizda bunday materiallarni yozishga asos bormi? Holat bo‘yicha tushuntirish xati olamiz. Siz bilan suhbatlashmasak bo‘lmaydi”, — degan tuman IIB vakili telefon suhbati vaqtida.
Elmurod Odilovning ta’kidlashicha, u chaqirilgan kuniyoq IIBga borgan va tushuntirish xati yozib bergan. “Tergovchi ‘delo’ni olib qo‘ydi. Ammo tuman hokimining arizasini ko‘rdim. Menga qarshi 10 ga yaqin ayblov qo‘yilmoqda, ular orasida konstitutsiyaviy tuzumga tajovuz qilish kabi jiddiy ayblovlar ham bor. Tergovchi ikki oy davomida meni chaqirib, tergov qilishini aytdi”, — deydi Elmurod bloger “Daryo” muxbiri bilan suhbatda.
Ayni vaqtda Yakkabog‘ tumani hokimligi axborot xizmati rahbari Sherzod Hasanov bloger Elmurod Odilov ustidan IIBga berilgan shikoyatlar orasida tuman hokimi Lutfiddin Abdullayevning arizasi yo‘qligini ma’lum qilib, bu haqidagi barcha gap-so‘zlarni “asossiz mish-mishlar” deb atadi.
“Ijtimoiy tarmoqlarda bloger Elmurod Odilovga qarshi tergov olib borish uchun Yakkabog‘ hokimi tomonidan ichki ishlar idoralariga xat chiqarilgan degan asossiz, mish-mish gaplar tarqaldi. Hokim Lutfiddin Abdullayev tomonidan blogerga qarshi hech qanday xat chiqarilmaganini ma’lum qilamiz. Shuningdek, blogerlardan Elmurod Odilovga qarshi xat kim tomonidan chiqarilganiga aniqlik kiritib, xulosa qilishlarini so‘rardik”, — degan u.
Sherzod Hasanov “Daryo” muxbiri bilan suhbatda Yakkabog‘ hokimi blogerning ustidan hech qanday shikoyat qilmasligini, buning uchun hech qanday asos ham yo‘qligini ta’kidlab, hokim Abdullayev nafaqat blogerlar, balki barcha OAV xodimlari bilan hamkorlikka tayyorligini alohida ta’kidlab o‘tdi.
Izoh (0)