Toshkent viloyatining Yangiyo‘l tumanida pora evaziga fermer xo‘jaligining 6 sotix yerini olib berishni va’da qilgan shaxs ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ma’lum qilinishicha, fuqaro A.Ch. boshqa bir fuqaro Q.ga o‘zini go‘yoki “V” fermer xo‘jaligi rahbari deb tanishtirib, unga xo‘jalikning sug‘oriladigan va ball boniteti yuqori bo‘lgan yer maydonidan 6 sotixini 9 000 dollarga sotishni va’da qilgan.
Vakolatli tanishlari orqali hujjatlarni tayyorlab berish evaziga oldindan 3 000 dollarini olgan vaqtida departamentning Toshkent viloyati boshqarmasi tomonidan DXX bilan hamkorlikda Yangiyo‘l tumanida o‘tkazilgan tezkor tadbirda ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28-, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Surxondaryoda hokimlik zaxirasida bo‘lgan yerni 70 million so‘mga sotmoqchi bo‘lgan shaxs ushlangani, Bo‘stonliqda ot sportiga ajratilgan 25,4 gektar yerni 1,5 million dollarga sotmoqchi bo‘lgan shaxs qo‘lga olingani, Surxondaryoda 50 sotix yerni o‘ziga tegishli ekanligiga ishontirib, 150 million so‘mga sotmoqchi bo‘lgan shaxs ushlangani haqida xabar berilgandi.
Izoh (0)