Қашқадарё вилояти Қарши тумани «Тинчлик» маҳалла фуқаролар йиғини Пармитон қишлоғида яшовчи аҳоли ўз уйларига кириб-чиқиш учун қабристон оралаб юришга мажбур бўлмоқда. Бундай ҳолат маҳалла аҳолиси фойдаланиб келган йўл бир фуқарога уй қуриш учун бериб юборилгани сабаб юзага келган, дея хабар бермоқда «Дарё» мухбири.
Пармитоннинг муаммоли қисмида 2011 йилдан уйлар қурила бошланган, 2019 йили эса қишлоқ аҳолиси фойдаланиб келган йўл устига, маҳаллий масъуллар рухсати билан, яна бир ҳовли тушган. Шундан бери аҳоли қабристон орқали юришга мажбур.
«Майли, ўша пайт ҳокимлик фуқарони ўйлаб, йўл устидан ҳам уй қуришга рухсат бергандир. Аммо бизга ҳам йўл очиб бериши керак-ку, тўғрими?», — дея савол қўяди пармитонлик Ғолиб Қиличев. Унинг сўзларига кўра, ҳудуддаги 30 хонадоннинг 150—200 чоғли аҳолиси кечаю кундуз қабристон оралаб уйига кириб-чиқади.
«Болаларимиз мактабга борадиган пайтда қабристонга майит келиб қолиши бор -- ёш бола майит турган ердан ўтади. Улар бундан қўрқмайди, ё сесканиб бирор касаллик юқтириб олмайди, деб ким кафолат бера олади? Ҳеч ким», -- дейди Дилбар Тўраева. Ҳомиладор келинларидан хавотирланаётган онахонлар ҳам кам эмас.
Энг қизиғи, қишлоққа чақирилган тез ёрдам, сув ташувчи машина ва ҳатто ўт ўчириш машинаси ҳам қабристон ўртасидан ўтган шу кичик йўлдан юришга мажбур. «Тез ёрдам машинаси баъзан маҳаллага киришни ҳам хоҳламайди, таксиларни-ку гапирмаса ҳам бўлади -- қабристон оралаб юрмайман деб, ичкари кирмайди», — дейди аҳоли.
«Тинчлик» маҳалласи раиси Самандар Сатторов пармитонликларнинг шикояти ўринли эканини тасдиқларкан, ўзи вилоят Архитектура бошқармасига, туман архитектура масъулларига хат чиқарганини маълум қилди. «Шу муаммо ҳал бўлса, кўнглим хотиржам бўларди», -- дейди раис. Бироқ, икки ой ўтса ҳамки, бирор жавоб бўлгани йўқ.
Пармитонликларнинг тан олишича, дастлабки шикоятлардан сўнг расмийлар «йўл очиб бердик» дея 2 километр узоқликдаги совхоз йўлидан фойдаланишни таклиф қилган, бироқ бу йўлдан ҳеч ким фойдаланмайди -- у узоқ, ноқулай, қишда лойлигидан юриб бўлмайди. «Биз 2 километр наридаги йўлдан эмас, 20—30 метр юриб, маҳалла бошидаги асфальт йўлдан юришни хоҳлаймиз», — дейди Бувиш Ғўччиева.
Аҳоли йўлсизликдан ҳам аввал айнан масъуллар бепарволигидан кўпроқ чарчаган. «Муаммомизга сал эътибор қаратиб, қабристон дарвозасини ичкарига кўчиришса, олам гулистон. Қабристон дарвозаси ичкарига кирса, алоҳида йўл учун ер очилади. Майли, ўша йўлни таъмирлаш ишларини ҳам ўзимиз бажарамиз, фақат йўл очиб беришсин, шунинг ўзи етарли», — деди пармитонликлар.
Изоҳ (0)