Toshkentda konteyner ortilgan yuk mashinasi borib urilgan ko‘prik ostidagi yo‘l to‘sib qo‘yildi

Toshkentning Yakkasaroy tumanida konteyner ortilgan Howo yuk mashinasi ko‘prik ostidagi betonga urilgandi. Telegram’dagi TashkentLand kanalining yozishicha, yo‘lning aynan shu qismi harakatlanish uchun to‘sib qo‘yildi.

Qayd etilishicha, Howo yuk mashinasi borib urilgan polosada metalldan yasalgan maxsus tirgak o‘rnatildi.

Eslatib o‘tamiz, 9-iyul kuni soat 11:40 larda Yakkasaroy tumani, KHAY–Bobur ko‘chalari kesishmasi ko‘prik ostida haydovchi Howo yuk mashinasida 3.13 “cheklangan balandlik” yo‘l belgisiga amal qilmay harakatlanib, ko‘prik ostidagi betonga urilib, yo‘l-transport hodisasini sodir qilgandi.

Ijtimoiy tarmoqlarda hodisa aks etgan video ham tarqaldi. Unda yuk mashinasi ko‘prik tagida tiqilib qolib, chiqib ketishga harakat qilayotgani, ko‘prikka jiddiy shikast yetganini ko‘rish mumkin.

Ayni paytda holat yuzasidan Toshkent shahar IIBB YHXB xodimlari tomonidan ma’muriy ish hujjatlari rasmiylashtirilgan, surishtiruv ishlari olib borilmoqda.