Интернетда митти фронтал камерага эга Google Pixel 6’нинг «жонли» сурати пайдо бўлди

Хитойлик манбалар Google Pixel 6 смартфонининг фойдаланувчи қўлида ёқилган ҳолда тургани тасвирланган биринчи ҳақиқий сурати билан бўлишди, деб ёзади IXBT.

Суратларга кўра, Google Pixel 6 олдинроқ эълон қилинган компьютер рендерлари каби дизайнга эга бўлган. Шунингдек, таъкидланишича, смартфон улкан ҳошиясиз экрани ва митти фронтал камераси сабаб суратдагидан анча ҳайратланарли кўриниш олган.

Орқа панел дизайни Google Pixel 6’ни бошқа бирор смартфон билан адаштириб юбориш имконини бермайди, ҳатто у ҳимоя ғилофида бўлса ҳам. Орқа панел икки хил рангда ишланган, камераси эса қора ялтироқ аксентга эга.

Миш-мишларга кўра, Google Pixel 6’га 6,4 дюймли AMOLED экран, 8 гигабайт тезкор ҳамда 128/256 гигабайт ички хотира ўрнатилади. Асосий камераси 50 мегапикселни ташкил этади, фронтал камераси 8 мегапикселга эга бўлади. Шунингдек, аккумулятор сиғими 4614 мА/соатни ташкил этиши мумкин.

Янги модель тақдимоти 2021 йилнинг октябрига мўлжалланган.