Ijtimoiy tarmoqda ayol va erkak kishining do‘kondan o‘g‘rilik sodir etayotgani aks etgan video tarqaldi. Toshkent shahar IIBB xodimlari ushbu videotasvirni o‘rganib chiqdi.
Mazkur holat bo‘yicha Toshkent shahar IIBBga ariza kelib tushmagan. Shunga qaramasdan, Toshkent shahar IIBB xodimlari videotasvirni o‘rganib, avtomobil raqami orqali haydovchini va avtomobil egasining shaxsini aniqladi.
Captiva (davlat raqami 01 D 080 NA) rusumli avtomobil 30 yoshli A.D.ga tegishli, lekin ko‘pincha transport vositasini ishonchnoma orqali uning akasi 41 yoshli A.D. boshqaradi.
Ushbu fuqaro topilib, holatga oydinlik kiritish maqsadida Toshkent shahar IIBBga chaqirtirildi. A.ning so‘ziga ko‘ra, holat 2021-yil 26-iyun kuni soat 21:00 larda Toshkent viloyati Toshkent tumani Ravnaq ko‘chasida sodir bo‘lgan.
Do‘kon egasi Toshkent viloyati IIBBga ariza bilan murojaat qilib, haqiqatan ham o‘g‘rilik yuz berganligini tasdiqlagan va 225 000 so‘m miqdorida moddiy zarar yetkazilganini ma’lum qilgan.
Holat yuzasidan Toshkent viloyati IIBB tomonidan tergovga qadar tekshiruv o‘tkazilmoqda, natijasi bo‘yicha qonuniy qaror qabul qilinadi.
Bundan avval Toshkentda mors bochkasini o‘g‘irlagan erkakka nisbatan jinoyat ishi qo‘zg‘atilgani, Buxoroda voyaga yetmagan ikki qiz o‘zganing xonadonidan konditsioner o‘g‘irlagani hamda Denovda 4 yoshli qizning tilla ziragini o‘g‘irlash uchun unga 4 ta uyqu dori bergan maktab o‘quvchisiga jinoyat ishi qo‘zg‘atilgani haqida xabar berilgandi.
Izoh (0)