Fuqarolarni Toshkent irrigatsiya va qishloq xo‘jaligini mexanizatsiyalash muhandislari instituti Buxoro filialiga o‘qishga kiritib qo‘yishni va’da qilgan shaxs hamda uning sherigi ushlandi. Bu haqda Bosh prokuratura huzuridagi departament xabar berdi.
Ma’lum qilinishicha, Bosh prokuratura huzuridagi departament hamda DXXning Buxoro viloyati boshqarmalari tomonidan Milliy gvardiya xodimlari bilan hamkorlikda tezkor tadbir o‘tkazilgan. Tadbir davomida muqaddam firibgarlik va boshqa jinoyatlari uchun sudlangan Sh.Sh. ismli shaxs ikki nafar fuqaroni vakolatli tanishlari orqali Toshkent irrigatsiya va qishloq xo‘jaligini mexanizatsiyalash muhandislari instituti Buxoro filialiga o‘qishga kiritib qo‘yishga va’da bergani aniqlangan.
Xizmati evaziga u kelishilgan 4 ming dollarni olgan vaqtida ushlangan. Shuningdek, uning ko‘rsatmalariga asosan davom etgan tadbirda Sh.Sh.ning U.J. ismli sherigi undan 4 ming dollarni olgan vaqtida ashyoviy dalillar bilan qo‘lga olingan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkentda vazirlikda ishlashini aytib, o‘qishga kiritib qo‘yish evaziga fuqarodan 10 ming dollar olgan shaxs ushlangani, Chirchiq davlat pedagogika institutiga o‘qishga kiritib qo‘yish uchun ikki kishidan 9 ming dollar olgan yana bir shaxs qo‘lga olingani, Qoraqalpoq davlat universitetiga o‘qishga kiritib qo‘yish uchun 25 million so‘m talab qilgan assistent ushlangani to‘g‘risida xabar berilgandi.
Mavzuga doir:
- Buxoroda talabaning o‘qishini sirtqi bo‘limga ko‘chirib berish uchun 500 dollar so‘ragan dekan o‘rinbosari ushlandi
- Surxondaryoda o‘qishga kiritib qo‘yish uchun 4 ming dollar so‘ragan o‘qituvchi ushlandi
- Samarqandda Toshkent tibbiyot akademiyasiga 7 ming dollarga o‘qishga kiritib qo‘ymoqchi bo‘lgan xususiy o‘quv markazi rahbari ushlandi
Izoh (0)