“O‘zbekiston shampani” aksiyadorlik jamiyatining davlat ulushini sotib olish uchun arizalar qabul qilish boshlandi

Davlat aktivlarini boshqarish agentligi huzuridagi UzAssets investitsiya kompaniyasi “O‘zbekiston shampani” aksiyadorlik jamiyatidagi o‘z ulushini sotish niyatida ekanligini ma’lum qildi, deb yozadi Spot’ga asoslanib “Gazeta.uz”.

Gap kompaniyaning 51,48 foiz davlat ulushini sotish haqida ketmoqda. KPMG maslahatchi sifatida tanlandi. Savdo jarayoni ikki bosqichdan iborat:

• talabnoma va talablarga javob beradigan shaklda ariza yuborish orqali qiziqish bildirish;
• tijorat va moliyaviy takliflarni ko‘rib chiqish va bitimni tuzish.

Ikkinchi bosqich ishtirokchilaridan 9-sentabrga qadar bitim tuzish uchun majburiy taklif yuborishlari so‘raladi. Bitimning o‘zi “Toshkent” Respublika fond birjasi qoidalariga va O‘zbekiston qonunchiligiga muvofiq amalga oshiriladi.

“O‘zbekiston shampani” kompaniyasi to‘g‘risida

1942-yilda tashkil etilgan kompaniya o‘zini shampan va gazlangan vinolarni ishlab chiqarish bo‘yicha yagona ixtisoslashgan zavod sifatida tan oladi.

Hozirgi ishlab chiqarish quvvati yiliga 788 ming dekalitr alkogolli ichimliklar, 2020-yilda ishlab chiqarish quvvati 62 foizni tashkil etgan.

Mahsulotlarning asosiy hajmi ichki bozorda sotiladi. Mahsulotlarning bir qismi Hindiston, Koreya, Mo‘g‘ilistonga eksport qilinadi.

Kompaniya o‘zining xomashyo bazasiga ega, shuningdek, Portugaliya, Rossiya, Fransiyadan import qilinadigan xomashyolardan foydalanadi. Xodimlarning umumiy soni 200 kishidan ortiq.

2020-yilgi daromad 65,6 milliard so‘mni, sof foyda 2 milliard so‘mni, kapital rentabelligi 17,2 foizdan oshiqni tashkil etdi.

Shuningdek, davlat boshqa vino ishlab chiqaruvchi korxonalarni – “Xovrenko nomidagi Samarqand vino zavodi”, “Toshkentvino”, “Nukus vino zavodi”, “Shahrisabz vino-aroq”, “Sirdaryo vino” va boshqalarni xususiylashtirishga tayyorlanmoqda.

Bundan avval O‘zbekistonda tabiiy vinoga aksiz solig‘i bekor qilinishi kutilayotgani hamda Shavkat Mirziyoyev oxirgi to‘rt yilda 52 ming gektar yangi tokzorlar tashkil etilib, sohaga 210 milliard so‘m subsidiyalar ajratilganini ma’lum qilgani haqida xabar berilgandi.