Ижтимоий тармоқда аёл ва эркак кишининг дўкондан ўғрилик содир этаётгани акс этган видео тарқалди. Тошкент шаҳар ИИББ ходимлари ушбу видеотасвирни ўрганиб чиқди.
Мазкур ҳолат бўйича Тошкент шаҳар ИИББга ариза келиб тушмаган. Шунга қарамасдан, Тошкент шаҳар ИИББ ходимлари видеотасвирни ўрганиб, автомобиль рақами орқали ҳайдовчини ва автомобиль эгасининг шахсини аниқлади.
Captiva (давлат рақами 01 D 080 NА) русумли автомобиль 30 ёшли А.Д.га тегишли, лекин кўпинча транспорт воситасини ишончнома орқали унинг акаси 41 ёшли А.Д. бошқаради.
Ушбу фуқаро топилиб, ҳолатга ойдинлик киритиш мақсадида Тошкент шаҳар ИИББга чақиртирилди. А.нинг сўзига кўра, ҳолат 2021 йил 26 июнь куни соат 21:00 ларда Тошкент вилояти Тошкент тумани Равнақ кўчасида содир бўлган.
Дўкон эгаси Тошкент вилояти ИИББга ариза билан мурожаат қилиб, ҳақиқатан ҳам ўғрилик юз берганлигини тасдиқлаган ва 225 000 сўм миқдорида моддий зарар етказилганини маълум қилган.
Ҳолат юзасидан Тошкент вилояти ИИББ томонидан терговга қадар текширув ўтказилмоқда, натижаси бўйича қонуний қарор қабул қилинади.
Бундан аввал Тошкентда морс бочкасини ўғирлаган эркакка нисбатан жиноят иши қўзғатилгани, Бухорода вояга етмаган икки қиз ўзганинг хонадонидан кондиционер ўғирлагани ҳамда Деновда 4 ёшли қизнинг тилла зирагини ўғирлаш учун унга 4 та уйқу дори берган мактаб ўқувчисига жиноят иши қўзғатилгани ҳақида хабар берилганди.
Изоҳ (0)