Qirg‘iziston parlamenti chegara xizmati raisi Ularbek Sharsheyevdan o‘z lavozimini tark etishni talab qildi. Bunga “Sapat” qirg‘iz—turk litseylari tarmog‘i rahbari Orxan Inandaning Turkiya maxsus xizmatlari tomonidan o‘g‘irlab ketilishi sabab bo‘lgan, deb yozadi “Izvestiya”.
7-iyul kuni Qirg‘iziston Qonunchilik Assambleyasi yig‘ilishi bo‘lib o‘tdi. Deputatlar xorijiy razvedka agentlari qanday qilib mamlakat hududiga kirib, qirg‘iz fuqarosini hech bir to‘siqsiz olib chiqib ketganini so‘radi.
“Bu yerda nima qilib o‘tiribsiz? Nega nafaqaga chiqmayapsiz? Xorijiy maxsus xizmatlar mamlakatga kirib, fuqaroni olib ketishiga qanday yo‘l qo‘yildi? Bu davlatga xiyonat bilan barobar. Siz bu ishga javob berishingiz kerak!” — dedi Janar Akayev g‘azab bilan Sharsheyevga.
Deputat Abduvahob Nurboyev Milliy xavfsizlik davlat qo‘mitasi vakillariga o‘z vazifalarini uddalay olmaganini aytgan.
5-iyul kuni Turkiya prezidenti Rajab Toyyib Erdo‘g‘on Qirg‘izistonda bir oy oldin g‘oyib bo‘lgan Orxan Inandi maxsus operatsiya doirasida hibsga olinib, respublikaga olib kelinganini ma’lum qilgandi. Davlat rahbarining so‘zlariga ko‘ra, erkak Turkiyada terrorchilik tashkiloti deb tan olingan FETO’ning rahbarlaridan biri bo‘lgan.
“Biz davlatga va millatga xiyonat qiladigan va qon to‘kadigan biron-bir tuzilmaning mavjud bo‘lishiga yo‘l qo‘ymaymiz”, — dedi Erdo‘g‘on.
Bunga javoban Qirg‘izistondagi Turkiya elchisi Ahmad Sodiq Dog‘anga nota topshirildi. Bishkek bayonotiga ko‘ra, Anqaraning xatti-harakatlari nojoiz, chunki ular xalqaro huquq me’yorlarini qo‘pol ravishda buzadi va inson erkinliklarini inobatga olmaydi.
Bundan tashqari, Qirg‘iziston Tashqi ishlar vazirligi o‘g‘irlangan fuqaroni o‘z vataniga qaytarish uchun barcha sa’y-harakatlarni amalga oshirishga va’da berdi.
“Sapat” xalqaro ta’lim muassasasi rahbari, Qirg‘iziston fuqarosi Orxan Inandi 1-iyunga o‘tar kechasi g‘oyib bo‘lgan edi.
Shundan keyin Qirg‘iziston politsiyasi “odam o‘g‘irlash” moddasi bilan ish ochib, uni qidirishni boshlagan. Ichki ishlar vazirligi rahbari Ulan Niyozbekov bu ishni zudlik bilan o‘z qo‘liga olgan. Ichki ishlar vazirligi qidiruv ishlariga 1000 dan ortiq politsiyachilar jalb qilinganini xabar qildi. Shuningdek, ichki ishlar vaziri o‘rinbosari Nurbek Abdiyevning so‘zlariga ko‘ra, Inandi Interpol orqali qidirilgan.
“Sapat” direktori Nurlan Xudayberdiyev Orxan Inandining o‘g‘irlanishini Turkiyadagi siyosiy vaziyat bilan bog‘lab, “bu ishning ortida turk hukumati turishi mumkin” degan fikrni ilgari surgan.
Human Rights Watch (HRW) xalqaro inson huquqlari tashkiloti Qirg‘iziston rasmiylarining Orxan Inandining o‘g‘irlab ketilishi bo‘yicha tergov o‘tkazishga chaqirgan bayonotini chiqargan.
HRW Inandini Turkiyada terrorchilik tashkiloti deb tan olingan FETO jamoat tashkilotining rahbari Fathulla Gyulen bilan aloqadorligi uchun o‘g‘irlab ketilgan bo‘lishi mumkinligini istisno qilmagandi.
Izoh (0)