Қирғизистон фуқароси Туркия томонидан ўғирлаб кетилгач, Қирғизистонда чегара хизмати раҳбарининг истеъфоси талаб қилинди

Қирғизистон парламенти чегара хизмати раиси Уларбек Шаршеевдан ўз лавозимини тарк этишни талаб қилди. Бунга «Сапат» қирғиз—турк лицейлари тармоғи раҳбари Орхан Инанданинг Туркия махсус хизматлари томонидан ўғирлаб кетилиши сабаб бўлган, деб ёзади «Известия».

7 июль куни Қирғизистон Қонунчилик Ассамблеяси йиғилиши бўлиб ўтди. Депутатлар хорижий разведка агентлари қандай қилиб мамлакат ҳудудига кириб, қирғиз фуқаросини ҳеч бир тўсиқсиз олиб чиқиб кетганини сўради.

«Бу ерда нима қилиб ўтирибсиз? Нега нафақага чиқмаяпсиз? Хорижий махсус хизматлар мамлакатга кириб, фуқарони олиб кетишига қандай йўл қўйилди? Бу давлатга хиёнат билан баробар. Сиз бу ишга жавоб беришингиз керак!» — деди Жанар Акаев ғазаб билан Шаршеевга.

Депутат Абдуваҳоб Нурбоев Миллий хавфсизлик давлат қўмитаси вакилларига ўз вазифаларини уддалай олмаганини айтган.

5 июль куни Туркия президенти Ражаб Тоййиб Эрдўғон Қирғизистонда бир ой олдин ғойиб бўлган Орхан Инанди махсус операция доирасида ҳибсга олиниб, республикага олиб келинганини маълум қилганди. Давлат раҳбарининг сўзларига кўра, эркак Туркияда террорчилик ташкилоти деб тан олинган FETO’нинг раҳбарларидан бири бўлган.

«Биз давлатга ва миллатга хиёнат қиладиган ва қон тўкадиган бирон-бир тузилманинг мавжуд бўлишига йўл қўймаймиз», — деди Эрдўғон.

Бунга жавобан Қирғизистондаги Туркия элчиси Аҳмад Содиқ Доғанга нота топширилди. Бишкек баёнотига кўра, Анқаранинг хатти-ҳаракатлари ножоиз, чунки улар халқаро ҳуқуқ меъёрларини қўпол равишда бузади ва инсон эркинликларини инобатга олмайди.

Бундан ташқари, Қирғизистон Ташқи ишлар вазирлиги ўғирланган фуқарони ўз ватанига қайтариш учун барча саъй-ҳаракатларни амалга оширишга ваъда берди.

«Сапат» халқаро таълим муассасаси раҳбари, Қирғизистон фуқароси Орхан Инанди 1 июнга ўтар кечаси ғойиб бўлган эди.

Шундан кейин Қирғизистон полицияси «одам ўғирлаш» моддаси билан иш очиб, уни қидиришни бошлаган. Ички ишлар вазирлиги раҳбари Улан Ниёзбеков бу ишни зудлик билан ўз қўлига олган. Ички ишлар вазирлиги қидирув ишларига 1000 дан ортиқ полициячилар жалб қилинганини хабар қилди. Шунингдек, ички ишлар вазири ўринбосари Нурбек Абдиевнинг сўзларига кўра, Инанди Интерпол орқали қидирилган.

«Сапат» директори Нурлан Худайбердиев Орхан Инандининг ўғирланишини Туркиядаги сиёсий вазият билан боғлаб, «бу ишнинг ортида турк ҳукумати туриши мумкин» деган фикрни илгари сурган.

Human Rights Watch (HRW) халқаро инсон ҳуқуқлари ташкилоти Қирғизистон расмийларининг Орхан Инандининг ўғирлаб кетилиши бўйича тергов ўтказишга чақирган баёнотини чиқарган.

HRW Инандини Туркияда террорчилик ташкилоти деб тан олинган FETO жамоат ташкилотининг раҳбари Фатҳулла Гюлен билан алоқадорлиги учун ўғирлаб кетилган бўлиши мумкинлигини истисно қилмаганди.