Britaniyalik milliarder Jim Retkliffga tegishli Ineos Automotive kompaniyasi 2020-yilda Grenadier yo‘ltanlamasining eksteryerini taqdim etgandi. Endilikda klassik Land Rover Defender’ning “taqlidchisi” bo‘lgan burchakli avtomobilga oid batafsil ma’lumotlar paydo e’lon qilindi, deb xabar beradi Motor.

Markaziy panel, multirul, shuningdek, Grenadier shiftidagi lyuk orasiga ko‘plab tugma va murvatlar o‘rnatilgan. Shiftga joylashtirilgan tugmalar yordamida haydovchi differensialni bloklashni boshqarishi, shuningdek, harakatlanish rejimlarini o‘zgartirishi mumkin. Bundan tashqari, tugmalar yordamida chig‘ir va qo‘shimcha tashqi yoritishni boshqarsa bo‘ladi — ishlab chiqaruvchi ushbu funksiyalar ostida “bo‘sh” o‘chirib-yoqqichlarni qoldirgan.

Shuningdek, old panelda diagonali 12,3 dyuymga yetadigan tachskrin joylashgan. Grenadier’ning multimedia tizimi ancha zamonaviy: u Apple CarPlay va Android Auto protokollarini qo‘llab-quvvatlaydi hamda iDrive uslubida “shayba” yordamida boshqariladi.

Biroq yo‘ltanlamas salonining asosiy o‘ziga xosligi — uni shlang yordamida yuvish imkoniyati. Rezina bilan qoplangan pol qismda suv chiqib ketishiga mo‘ljallangan teshiklar mavjud, o‘rindiqlar esa tez tozalanadigan mato bilan qoplangan. Ammo mijozlar gilamchalar va charm bilan qoplangan versiyani ham buyurtma qila oladi.

Grenadier BMW motori yordamida harakatga keladi, shuningdek, avtomat uzatmalar qutisi ZF’niki. Gap 281 ot kuchini (450 Nm) taqdim etishga qodir olti litrli benzin dvigatel haqida ketmoqda.

Ineos yo‘ltanlamaslari uchun buyurtmalar oktabr oyidan boshlab qabul qilinadi, mashinalar ilk mijozlarga 2022-yilning iyulidan jo‘natiladi. Avvaliga besh eshikli versiya, keyinroq pikaplar yaratiladi.

Avvalroq eng tezkor va kuchli Land Rover Defender auksion orqali sotilayotgani to‘g‘risida xabar berilgandi.