Farg‘onada YPX xodimi faoliyatiga xalal berib, uning xizmat avtomashinasiga shikast yetkazgan ikki nafar fuqaroga sud tomonidan jazo tayinlandi. Bu haqda “Daryo”ga Jinoyat ishlari bo‘yicha Uchko‘prik tuman sudi raisi Nodirjon Mirzajonov ma’lum qildi.
Qayd etilishicha, 2021-yilning 30-iyun kuni soat 17:30 da Uchko‘prik tumani Tojik qishlog‘i hududida Farg‘ona viloyati IBB YHXGning multiradar qurilmasi bilan jihozlangan Nexia rusumli, davlat raqami 40 Q 309 RBA bo‘lgan avtomashina tezlikni oshirib harakatlanayotgan transport vositalarini aniqlash maqsadida xizmat olib borgan.Shu vaqtda fuqarolar T.M. va A.X. xizmat vazifasini bajarayotgan YPX inspektori oldiga kelib, jamoat tartibini buzib, baqir-chaqir qilib, hududda boshqa fuqarolarning to‘planishiga sababchi bo‘lgan. Ular ichki ishlar xodimining qonuniy talablarini bajarmay, jamiyatda yurish-turish qoidalarini qasddan mensimasdan, mayda bezorilik sodir etgan.
Shuningdek, fuqaro A.X. Farg‘ona viloyati IIB YHXGning multiradar qurilmasi bilan jihozlangan Nexia rusumli avtomashinasiga shikast yetkazgan.
Holat yuzasidan Jinoyat ishlari bo‘yicha Uchko‘prik tuman sudida o‘tkazilgan sud majlisida ikki nafar fuqaroga nisbatan 10 sutka ma’muriy qamoq jazosi tayinlangan.
Avvalroq Gulistonda mast holda jamoat tartibini buzib, IIB xodimlariga qarshilik ko‘rsatgan shaxs 5 sutkaga qamalgani, Farg‘onada YPX xodimiga bo‘ysunmagan haydovchiga 10 sutka ma’muriy qamoq jazosi tayinlangani to‘g‘risida xabar berilgandi.
Izoh (0)