Energetika vazirligi matbuot kotibi Elmira Bekmurodova so‘nggi kunlarda elektr energiyasida uzilishlar bo‘layotgani tufayli bayonot bilan chiqdi.
Matbuot kotibi Energetika vazirligi ijtimoiy tarmoqlardagi sahifalari orqali uzilishlar haqida tez-tez ma’lumotlar berib borilishi, ammo har bir uzilish holati norozilikni keltirib chiqarishi va ba’zan yetarlicha tortishuvlar bo‘lishini to‘g‘ri tushunishini ta’kidlab o‘tgan.
“Negaki sohada har qanday ob-havo va kunning har qanday vaqtida xonadoningizda elektr energiyasi bo‘lishi uchun ta’minot bilan bog‘liq har bir uzilishlarni imkon qadar tezroq bartaraf etishga qo‘llaridan kelgan barcha ishlarni qiladigan fidokorona insonlar mehnat qilishadi.
Shuni alohida ta’kidlash joizki, O‘zbekiston yoqilg‘i-energetika kompleksining keng ko‘lamli tizimi xodimlaridan hech biri elektr ta’minotidagi uzilishlardan manfaatdor emas, har birimiz o‘z o‘rnida mehnat qilib, umumiy ishimizning asosiy maqsadi — xalqimiz va mamlakatimiz iqtisodiyotini energiya resurslari bilan barqaror ta’minlashdan iboratdir.
Ammo energiya ta’minoti tizimida bu ancha murakkab jarayon. Uskunalar texnik xizmat ko‘rsatish va modernizatsiya ishlarining kechikishiga chiday olmaydi. Ular eskiradi va natijada shu kabi nosozliklarga olib keladi. Bundan tashqari, eski uskunalar shunchaki yangi quvvatlarga bardosh bera olmaydi. Bu esa bugungi kunda 25 yildan ortiq vaqt davomida energetika tizimining holatiga yetarlicha e’tibor berilmagani natijasidir”, — deydi vazirlik matbuot kotibi.
Elmira Bekmurodova elektr energiyasi ta’minotida bo‘layotgan uzilishlarga eski uskunalar sabab bo‘layotganini ta’kidlab o‘tgan.“So‘nggi ikki yarim yil ichida sohada katta ishlar amalga oshirildi. Ammo yigirma besh yillar davomida ishlab kelgan va eskirib ulgurgan uskunalarni qisqa fursatlarda yangilashning imkoni yo‘q”, — deydi u.
Vazirlik matbuot kotibi aholidan vaziyatni to‘g‘ri tushunib, olib borilayotgan ishlar natijasidagi o‘zgarishlarni to‘g‘ri tahlil qilishini istashini aytgan.
“Masalan, 5 yil oldin ham Samarqand va Buxoro singari tarixiy va sayyohlarga boy shaharlarda elektr energiyasining uzilishi bir necha kun va belgilangan jadvalda davom etar edi. Bugungi kunda, tizimda yuzaga kelayotgan muammolarni o‘rtacha 1—2 soatda yoki hatto undan ham kamroq muddatda hal qilayotgan ta’mirlash brigadalariga yana bir bor rahmat deyman.
Ular birovning xatosini tuzatgani uchun emas, balki ular energetika tizimida qanday ishlashini bilganim uchun men ularga chin dildan tashakkur aytaman. Ular eskirgan simlarni yangilash, ishlab chiqarishni ko‘paytirish, ya’ni elektr energiyasini ishlab chiqarish uchun qancha ish qilish kerakligini tushunishadi.
Ular bu muammolarga bir qancha omillar ta’sir qilishini, jumladan, gidroelektr stansiyalarning samaradorligiga ta’sir qiluvchi suv tanqisligini tushunadilar. Bizning mamlakatimizda ham ko‘plab mamlakatlarda yuzaga keladigan keng ko‘lamli elektr energiyasidagi uzilishlar sodir bo‘lmasligi uchun bu haqda qiziqishadi, o‘qishadi va bunday holatning oldini olish uchun nimalar qilish kerakligini tahlil qilishmoqda. Men bugun nafaqat noroziliklarni, balki vaqtinchalik uzilish sabablarini va mamlakatimizda barqaror energiya ta’minotimiz uchun ko‘rilayotgan choralarni tushunishingizni istardim”, — deydi Elmira Bekmurodova.
Izoh (0)