Фарғонада ЙПХ ходими фаолиятига халал бериб, унинг хизмат автомашинасига шикаст етказган икки нафар фуқарога суд томонидан жазо тайинланди. Бу ҳақда «Дарё»га Жиноят ишлари бўйича Учкўприк туман суди раиси Нодиржон Мирзажонов маълум қилди.
Қайд этилишича, 2021 йилнинг 30 июнь куни соат 17:30 да Учкўприк тумани Тожик қишлоғи ҳудудида Фарғона вилояти ИББ ЙҲХГнинг мултирадар қурилмаси билан жиҳозланган Nexia русумли, давлат рақами 40 Q 309 RBA бўлган автомашина тезликни ошириб ҳаракатланаётган транспорт воситаларини аниқлаш мақсадида хизмат олиб борган.Шу вақтда фуқаролар Т.М. ва А.Х. хизмат вазифасини бажараётган ЙПХ инспектори олдига келиб, жамоат тартибини бузиб, бақир-чақир қилиб, ҳудудда бошқа фуқароларнинг тўпланишига сабабчи бўлган. Улар ички ишлар ходимининг қонуний талабларини бажармай, жамиятда юриш-туриш қоидаларини қасддан менсимасдан, майда безорилик содир этган.
Шунингдек, фуқаро А.Х. Фарғона вилояти ИИБ ЙҲХГнинг мултирадар қурилмаси билан жиҳозланган Nexia русумли автомашинасига шикаст етказган.
Ҳолат юзасидан Жиноят ишлари бўйича Учкўприк туман судида ўтказилган суд мажлисида икки нафар фуқарога нисбатан 10 сутка маъмурий қамоқ жазоси тайинланган.
Аввалроқ Гулистонда маст ҳолда жамоат тартибини бузиб, ИИБ ходимларига қаршилик кўрсатган шахс 5 суткага қамалгани, Фарғонада ЙПХ ходимига бўйсунмаган ҳайдовчига 10 сутка маъмурий қамоқ жазоси тайинлангани тўғрисида хабар берилганди.
Изоҳ (0)