Qashqadaryo viloyatining Qarshi shahridagi “stoyanka”da haydovchining tobi qochib, voqea guvohlari YPX inspektorlarini ayblagan video tarqaldi. Bu haqda “Daryo”ga xabar bergan mushtariyning aytishicha, voqea 2021-yilning 8-iyul kuni tush paytida sodir bo‘lgan.

“Tobi qochgan haydovchi chiroqchilik ekan. Noqonuniy taksilar faoliyatiga qarshi ‘reyd’ tadbirlari o‘tkazilayotgan bo‘lgan. Bugun shunday tadbirlarning to‘rtinchi kunida shunday voqea sodir bo‘lgan”, — deydi “Daryo” muxbiri bilan suhbatlashgan xabarchi.

Mazkur voqeaga izoh bergan viloyat Yo‘l harakati xavfsizligi boshqarmasi axborot xizmati rahbari Javlon Baxtiyev voqeaga prokuratura xodimlari e’tibor qaratganini aytdi.

“Bu haqda prokuraturaga shikoyat tushgan. Shu bois, prokuratura xodimlari bizga ham chiqishdi va ma’lumot so‘rashdi. Bilasiz, xodimlar bilan bog‘liq har qanday holat prokuratura xodimlari tomonidan ko‘rib chiqiladi. Voqeaning aniq tafsilotlari haqida menda hozircha aniq ma’lumotlar yo‘q. Biroq tez orada aniqlashtiramiz”, — deydi viloyat YHXB axborot xizmati rahbari Javlon Baxtiyev.

Javlon Baxtiyevning aniqlashtirishicha, voqea 2021-yil 8-iyul emas, 7-iyulda sodir bo‘lgan.

“Menimcha, haydovchi IIB xodimlarining talabiga bo‘ysunmagan, so‘ngra IIB xodimlari haydovchiga kuch ishlatgan bo‘lishi mumkin. Men voqea joyiga borganimda haydovchining tobi qochib qolgan ekan. O‘sha yerdagilar uning tili tortilib ketayotganini, vaziyat jiddiy ekanligini aytib, shifoxonaga olib ketdi. Voqeaning keyingi tafsilotlaridan xabarim yo‘q”, — deydi ismi sir qolishini so‘ragan voqea guvohlaridan biri.

Viloyat Transport boshqarmasi axborot xizmati rahbari Mirzohid Jo‘rayevning “Daryo”ga ma’lumot berishicha, nafaqat Qarshi shahrida, viloyat miqyosida noqonuniy faoliyat yuritayotgan taksilar faoliyatiga qarshi “reyd” tadbirlari bo‘lib o‘tmoqda.

“Daryo” voqealar rivojini kuzatishda davom etadi.