Buxoro davlat tibbiyot instituti rektori Shuhrat Teshayevning koronavirus infeksiyasiga qarshi emlangani aks etgan surat ijtimoiy tarmoqlarda ko‘plab muhokamalarga sabab bo‘ldi. Suratni izohlaganlarning aksariyati “hamshira qo‘liga ‘perchatki’ kiyishni unutgani yetmagandek, shprisga nina qo‘yishni ham yodidan chiqarkan ko‘rinadi” deya holatni kulgiga yo‘ydi. “Daryo” muxbiri holatga oydinlik kiritishga urindi.
Qayd etilishicha, Buxoro davlat tibbiyot instituti jamoasi koronavirusga qarshi shahardagi 1-sonli oilaviy poliklinikada emlangan.
Poliklinika bosh shifokori Vali Mo‘minovga ko‘ra, institut rektori 2021-yilning 3-iyul kuni yashash hududidagi mazkur poliklinikada koronavirus infeksiyasiga qarshi emlangan. Va shu jarayonda Shuhrat Teshayev Sog‘liqni saqlash vazirligi tashabbusi bilan boshlangan chellenj uchun suratga tushgan.
Vali Mo‘minovning aytishicha, Shuhrat Teshayev o‘zbek-xitoy vaksinasi bilan emlangan, shuningdek, bu jarayon tibbiyot hamshirasi tomonidan 17-tartib raqam bilan ro‘yxatga olish daftarida qayd etilgan. Holat bino kuzatuv kameralarida ham yozib olingan.
“Aholi Sanitariya-epidemiologik osoyishtalik va jamoat salomatligi xizmati Buxoro viloyat boshqarmasi tomonidan berilgan 2,0 grammli shprislar yordamida emlanmoqda. Institut rektori emlanishi bilan bog‘liq holat Telegram’dagi Troll.uz kanalida noto‘g‘ri talqin qilingani barchamizni hayratda qoldirdi”, — deydi Vali Mo‘minov.
“Daryo” muxbiri surishtiruviga ko‘ra, institut rektori oilaviy poliklinika hamshirasi Guljamol Jo‘rayeva tomonidan emlangan.
“Shuhrat Teshayev emlanishga kirishidan oldin ikki nafar talabani tibbiy qo‘lqopda koronavirus infeksiyasiga qarshi emlab chiqargan edim. Hozir ham juda ko‘pchilik aholini barcha tibbiy qoidalarga jiddiy rioya qilgan holda emlayapmiz. 27 yillik ish tajribasiga egaman. Lekin baribir o‘sha kezda shoshib qoldimmi, institut rektorini o‘zim anglab-anglamagan holda tibbiyot qo‘lqopisiz emlabman. Ikki-uch kundan buyon oyoq-qo‘limda jon yo‘q. Kamchilik mendan o‘tgan, ammo ijtimoiy tarmoqlarda bu qadar shov-shuvlarga sabab bo‘layotgani ruhiyatimga ham qattiq ta’sir ko‘rsatyapti”, — deydi hamshira.
“Daryo” muxbiri rektorning qo‘lida emlanish izi mavjudligi bilan qiziqdi.
“Barchamiz koronavirus infeksiyasiga qarshi emlanish zarurati paytida bu ishni soxtakorlik bilan amalga oshirish yoxud birgina chellenj uchun ko‘zbo‘yamachilikka yo‘l qo‘yish hatto xayolimga ham kelmagan. Va meni atrofdagilarga o‘rnak bo‘lish o‘rniga nega bunday xatti-harakatda bo‘lishim kerak, degan savol qiynaydi. Ijtimoiy tarmoqlarda muhokamaga sabab bo‘layotgan bunday noto‘g‘ri talqindan qattiq ranjiganimni yashirmayman”, — deydi Shuhrat Teshayev.
Sanitariya-epidemiologik osoyishtalik va jamoat salomatligi xizmati viloyat boshqarmasi boshlig‘i Ashur To‘xtayev mazkur shpris ninalari deltasimon mushak sohasiga o‘tkazilishi hamda vaksinatsiyada nina oxirigacha mushak ichiga sanchilishini bildirgan.
“O‘zbekiston Respublikasi Sanitariya me’yor va qoidalarga ko‘ra, sog‘lom odamlarda emlash ishlarini tibbiy qo‘lqoplarda amalga oshirish shartmas. Bu jarayon tibbiyot xodimlar ko‘rigi hamda ularning ruxsati bilan amalga oshiriladi. Agar emlash ishlarini amalga oshirayotgan hamshira qo‘lida toshma yoki turli xildagi jarohatlar bo‘lsa, bunday paytda sog‘lom odamga ham tibbiy qo‘lqoplardan foydalanishi tavsiya qilinadi. Chunki emlash hamshirasi muolaja hamshiralaridan farqli ravishda sog‘lom kontingentni emlashadi”, — dedi viloyat sanitari, Sanitariya-epidemiologik osoyishtalik va jamoat salomatligi xizmati viloyat boshqarmasi immunoprofilaktika bo‘limi mudiri Dilrabo Berdiyeva.
Izoh (0)