Бухоро давлат тиббиёт институти ректори Шуҳрат Тешаевнинг коронавирус инфекциясига қарши эмлангани акс этган сурат ижтимоий тармоқларда кўплаб муҳокамаларга сабаб бўлди. Суратни изоҳлаганларнинг аксарияти «ҳамшира қўлига ‘перчатки’ кийишни унутгани етмагандек, шприсга нина қўйишни ҳам ёдидан чиқаркан кўринади» дея ҳолатни кулгига йўйди. «Дарё» мухбири ҳолатга ойдинлик киритишга уринди.
Қайд этилишича, Бухоро давлат тиббиёт институти жамоаси коронавирусга қарши шаҳардаги 1-сонли оилавий поликлиникада эмланган.
Поликлиника бош шифокори Вали Мўминовга кўра, институт ректори 2021 йилнинг 3 июль куни яшаш ҳудудидаги мазкур поликлиникада коронавирус инфекциясига қарши эмланган. Ва шу жараёнда Шуҳрат Тешаев Соғлиқни сақлаш вазирлиги ташаббуси билан бошланган челленж учун суратга тушган.
Вали Мўминовнинг айтишича, Шуҳрат Тешаев ўзбек-хитой вакцинаси билан эмланган, шунингдек, бу жараён тиббиёт ҳамшираси томонидан 17-тартиб рақам билан рўйхатга олиш дафтарида қайд этилган. Ҳолат бино кузатув камераларида ҳам ёзиб олинган.
«Аҳоли Санитария-эпидемиологик осойишталик ва жамоат саломатлиги хизмати Бухоро вилоят бошқармаси томонидан берилган 2,0 граммли шприслар ёрдамида эмланмоқда. Институт ректори эмланиши билан боғлиқ ҳолат Telegram’даги Troll.uz каналида нотўғри талқин қилингани барчамизни ҳайратда қолдирди», — дейди Вали Мўминов.
«Дарё» мухбири суриштирувига кўра, институт ректори оилавий поликлиника ҳамшираси Гулжамол Жўраева томонидан эмланган.
«Шуҳрат Тешаев эмланишга киришидан олдин икки нафар талабани тиббий қўлқопда коронавирус инфекциясига қарши эмлаб чиқарган эдим. Ҳозир ҳам жуда кўпчилик аҳолини барча тиббий қоидаларга жиддий риоя қилган ҳолда эмлаяпмиз. 27 йиллик иш тажрибасига эгаман. Лекин барибир ўша кезда шошиб қолдимми, институт ректорини ўзим англаб-англамаган ҳолда тиббиёт қўлқописиз эмлабман. Икки-уч кундан буён оёқ-қўлимда жон йўқ. Камчилик мендан ўтган, аммо ижтимоий тармоқларда бу қадар шов-шувларга сабаб бўлаётгани руҳиятимга ҳам қаттиқ таъсир кўрсатяпти», — дейди ҳамшира.
«Дарё» мухбири ректорнинг қўлида эмланиш изи мавжудлиги билан қизиқди.
«Барчамиз коронавирус инфекциясига қарши эмланиш зарурати пайтида бу ишни сохтакорлик билан амалга ошириш ёхуд биргина челленж учун кўзбўямачиликка йўл қўйиш ҳатто хаёлимга ҳам келмаган. Ва мени атрофдагиларга ўрнак бўлиш ўрнига нега бундай хатти-ҳаракатда бўлишим керак, деган савол қийнайди. Ижтимоий тармоқларда муҳокамага сабаб бўлаётган бундай нотўғри талқиндан қаттиқ ранжиганимни яширмайман», — дейди Шуҳрат Тешаев.
Санитария-эпидемиологик осойишталик ва жамоат саломатлиги хизмати вилоят бошқармаси бошлиғи Ашур Тўхтаев мазкур шприс ниналари дельтасимон мушак соҳасига ўтказилиши ҳамда вакцинацияда нина охиригача мушак ичига санчилишини билдирган.
«Ўзбекистон Республикаси Санитария меъёр ва қоидаларга кўра, соғлом одамларда эмлаш ишларини тиббий қўлқопларда амалга ошириш шартмас. Бу жараён тиббиёт ходимлар кўриги ҳамда уларнинг рухсати билан амалга оширилади. Агар эмлаш ишларини амалга ошираётган ҳамшира қўлида тошма ёки турли хилдаги жароҳатлар бўлса, бундай пайтда соғлом одамга ҳам тиббий қўлқоплардан фойдаланиши тавсия қилинади. Чунки эмлаш ҳамшираси муолажа ҳамшираларидан фарқли равишда соғлом контингентни эмлашади», — деди вилоят санитари, Санитария-эпидемиологик осойишталик ва жамоат саломатлиги хизмати вилоят бошқармаси иммунопрофилактика бўлими мудири Дилрабо Бердиева.
Изоҳ (0)