Ijtimoiy tarmoqlarda Nukusdagi xususiy tadbirkorga tegishli “Nukus hayvonot bog‘i”da jonivorlarning suvsizlikdan qiynalayotgani, ularga yaratilgan sharoitlar talab darajasida emasligi to‘g‘risida xabar tarqalgandi. Ekopartiya Qoraqalpog‘iston Respublikasi kengashi, Ekologiya va atrof-muhitni muhofaza qilish bo‘yicha Nukus shahar inspeksiyasi vakillari hamkorlikda mazkur hayvonot bog‘ida bo‘lib, o‘rganish ishlarini olib bordi.
O‘zAning ma’lum qilishicha, o‘rganish davomida qush va hayvonlarning saqlash sharoitida kamchiliklar aniqlandi.
Jumladan, hayvonlar saqlanadigan qafaslarni joriy ta’mirdan chiqarish, hayvonot bog‘i hududida obodonlashtirish ishlarini tashkil qilish borasida mutaxassislar tomonidan hayvonot bog‘i rahbariga ko‘rsatib o‘tilgan kamchiliklarni o‘z vaqtida bartaraf etish to‘g‘risida ko‘rsatma berildi.
O‘z navbatida Oliy Majlis Qonunchilik palatasidagi Ekologik partiya fraksiyasi a’zosi Leyli Seytova ham hayvonot bog‘i ma’muriyatiga kamchiliklarni belgilangan vaqtda bartaraf etish yuzasidan o‘z takliflarini berdi hamda holatni o‘z nazoratiga olganini bildirdi.
“O‘zbekiston Ekologik partiyasi hayvonlarga nisbatan shafqatsiz munosabatda bo‘lishni keskin qoralaydi”, — deyiladi xabarda.
Eslatib o‘tamiz, hayvonot bog‘lari — ilmiy-ma’rifiy muassasa hisoblanib, bu yerdagi jonivorlarni namoyish qilish, o‘rganish, ko‘paytirish maqsadida tutqunlik (qafas, volyer) yoki yarim tutqunlik (tabiiy yashash sharoitiga o‘xshash maydonlar)da boqiladi.
Hayvonot bog‘larida hayvonlar o‘rganiladi, tabiiy-ilmiy bilimlar, shuningdek, tabiatni muhofaza qilish masalalari targ‘ib qilinadi, hayvonlarning “Qizil kitob”ga kirgan turlari saqlanadi hamda ko‘paytiriladi.
Hayvonlarni iqlimlashtirish, kasalliklarini o‘rganish, davolash, oldini olish choralarini ishlab chiqish va boshqalar ustida ilmiy tajriba ishlari olib boriladi. O‘quvchilar uchun ekskursiyalar, zoologiyaga oid mavzularda leksiya, biologik ko‘rgazmalar uyushtiriladi.
Izoh (0)