Ижтимоий тармоқларда Нукусдаги хусусий тадбиркорга тегишли «Нукус ҳайвонот боғи»да жониворларнинг сувсизликдан қийналаётгани, уларга яратилган шароитлар талаб даражасида эмаслиги тўғрисида хабар тарқалганди. Экопартия Қорақалпоғистон Республикаси кенгаши, Экология ва атроф-муҳитни муҳофаза қилиш бўйича Нукус шаҳар инспекцияси вакиллари ҳамкорликда мазкур ҳайвонот боғида бўлиб, ўрганиш ишларини олиб борди.
ЎзАнинг маълум қилишича, ўрганиш давомида қуш ва ҳайвонларнинг сақлаш шароитида камчиликлар аниқланди.
Жумладан, ҳайвонлар сақланадиган қафасларни жорий таъмирдан чиқариш, ҳайвонот боғи ҳудудида ободонлаштириш ишларини ташкил қилиш борасида мутахассислар томонидан ҳайвонот боғи раҳбарига кўрсатиб ўтилган камчиликларни ўз вақтида бартараф этиш тўғрисида кўрсатма берилди.
Ўз навбатида Олий Мажлис Қонунчилик палатасидаги Экологик партия фракцияси аъзоси Лейли Сейтова ҳам ҳайвонот боғи маъмуриятига камчиликларни белгиланган вақтда бартараф этиш юзасидан ўз таклифларини берди ҳамда ҳолатни ўз назоратига олганини билдирди.
«Ўзбекистон Экологик партияси ҳайвонларга нисбатан шафқатсиз муносабатда бўлишни кескин қоралайди», — дейилади хабарда.
Эслатиб ўтамиз, ҳайвонот боғлари — илмий-маърифий муассаса ҳисобланиб, бу ердаги жониворларни намойиш қилиш, ўрганиш, кўпайтириш мақсадида тутқунлик (қафас, волер) ёки ярим тутқунлик (табиий яшаш шароитига ўхшаш майдонлар)да боқилади.
Ҳайвонот боғларида ҳайвонлар ўрганилади, табиий-илмий билимлар, шунингдек, табиатни муҳофаза қилиш масалалари тарғиб қилинади, ҳайвонларнинг «Қизил китоб»га кирган турлари сақланади ҳамда кўпайтирилади.
Ҳайвонларни иқлимлаштириш, касалликларини ўрганиш, даволаш, олдини олиш чораларини ишлаб чиқиш ва бошқалар устида илмий тажриба ишлари олиб борилади. Ўқувчилар учун экскурсиялар, зоологияга оид мавзуларда лексия, биологик кўргазмалар уюштирилади.
Изоҳ (0)