Toshkent hayvonot bog‘iga juda kam uchraydigan ikkita oq rangli sher bolalari olib kelindi (foto)

Toshkent hayvonot bog‘iga JAR (Afrika)dan Joni va Jenni laqabli ikkita sakkiz oylik oq sher bolalari olib kelindi, deb xabar bermoqda poytaxt hayvonot bog‘i matbuot xizmati.

Qayd etilishicha, oq sher — bu sherlarning alohida turkumi emas, balki “leykizm” nomi ostida ma’lum bo‘lgan mutatsiya natijasidir. Ular albinos emas. Ularning ko‘zlari va terisi normal tusda. Rangi ko‘zga tashlanadigan bo‘lgani sababli yovvoyi tabiat qo‘ynida yashash ular uchun juda murakkab masala va bu ov qilishda xalaqit beradi. Ular osongina boshqa yirtqichlar va brakonyerlarning o‘ljasiga aylanadi. Butun dunyo bo‘yicha ularning soni atigi 300 taga yetadi, shuning ham katta qismi hayvonot bog‘larida.

“Bizning oq sherchalarimiz esa volerimizga chiqarib yuborildi. Momiqvoylarimiz soni ko‘payganidan biz juda mamnunmiz. Bunday noyob jonivorlarni asrab qolish va ularga g‘amxo‘rlik qilish esa biz uchun katta sharaf”, — deyiladi xabarda.