Koronavirusning delta shtammi tufayli to‘liq lokdaun o‘rnatilgan Sidney — suratlarda

Avstraliya hukumati bir yildan ortiq vaqt ichida birinchi marta Sidney va uning atrofidagi hududlarda qat’iy ikki haftalik karantin joriy qildi. Bunga mamlakatda koronavirusning “hindcha” (delta) shtammi aniqlaganidan keyin COVID-19 bilan kasallanish holatlarining ortishi sabab bo‘ldi. Sidneyning to‘liq lokdaun o‘rnatilgandan keyingi ko‘rinishi haqida “RBK” fotoreportaj tayyorladi.

Avstraliyaning Yangi Janubiy Uels shtatida 26-iyun oqshomidan 9-iyul oxirigacha qat’iy karantin o‘rnatildi. Buyuk Sidney, Vullongong, Moviy tog‘lar va Markaziy sohilbo‘yi aholisi faqatgina oziq-ovqat, masofaviy olib borilmaydigan ish yoki o‘qish uchun, shuningdek, tibbiy yordam yoki ochiq havoda sport bilan shug‘ullanish uchun uylarini tark etishi mumkin.

Sidney va uning atrofidagi hududlarda umumiy ovqatlanish shoxobchalari faqat olib ketish va yetkazib berish shaklida ishlaydi, supermarketlar va oziq-ovqat do‘konlari yopilmaydi, ammo kinoteatrlar, teatrlar, konsert zallari, diskotekalar va boshqa ko‘ngilochar joylar faoliyati to‘xtatiladi.

Yangi Janubiy Uelsning butun hududi bo‘ylab niqob taqish majburiy etib belgilangan. Shuningdek, transportda va ochiq havoda o‘tkaziladigan tadbirlarda ham niqoblar talab qilinadi (tadbirlar 10 kishidan ko‘p bo‘lmagan doirada o‘tkazilishi mumkin).

Shtat sport tadbirlarini bekor qildi, 28-iyundan to‘ylarni nishonlash taqiqlanadi, dafn marosimiga tashrif buyuruvchilar soni esa 100 kishidan ortmasligi kerak. Mehmonlar ijtimoiy masofa saqlab turishlari shart— har 4 kvadrat metrga bir kishi.

Yangi Janubiy Uels “qizil” hudud deb e’lon qilingandi. Ba’zi shtatlarda Uelsdan tashrif buyuruvchilar ikki haftalik karantindan o‘tishga majbur, boshqalarida esa masalan, G‘arbiy va Janubiy Avstraliyada Uels bilan chegaralar to‘liq yopiq.

Yangi Janubiy Uelsda cheklovlar hududda “hindcha” (delta) shtamm tarqala boshlangandan so‘ng joriy etildi. Jahon sog‘liqni saqlash tashkiloti ma’lumotlariga ko‘ra, koronavirusning Hindistonda paydo bo‘lgan mazkur shtammi Uxandagi “asl” variantdan yuqumliroq.

Iyun oyi o‘rtalarida xalqaro reyslar ekipajlarini bir aeroportdan ikkinchisiga yetkazib beradigan avtomobil haydovchisida “hindcha” shtamm aniqlandi. 25-iyunga qadar Yangi Janubiy Uelsda yangi shtamm bilan kasallanganlar sonining kunlik o‘sishi 22 kishiga yetdi. 28-iyun kuni 128 kishida “hindcha” shtamm qayd etildi.

Yangi Janubiy Uels — Avstraliyaning eng aholisi zich mintaqalaridan biri. Shtat bosh vaziri Gledis Berejiklyanning so'zlariga ko‘ra, “hozir pandemiya boshlanganidan beri kuzatilgan eng yomon davr”. Yangi shtammning tez tarqalishi tufayli Avstraliyaning boshqa shtatlarida ham cheklovlar o‘rnatildi. Masalan 29-iyundan Kvinslendda uch kunlik lokdaun boshlanadi.

Umuman olganda, Avstraliyada bir yarim yillik pandemiya davomida 30,5 ming kishi COVID-19’ni yuqtirgan, ularning 1000 nafardan kamrog‘i vafot etgan. Mamlakatda birinchi qat’iy lokdaun 2020-yil 23 -martda joriy qilingandi. O‘shanda avstraliyaliklar uchun barlarga, sport zallariga, ko‘ngilochar tadbirlarga, kafe va restoranlarga tashrif buyurish taqiqlangandi, faqat olib ketish va yetkazib berish xizmatlari ish olib borgan, ommaviy tadbirlar bekor qilingan.