Россия президенти Владимир Путин Кремлда Қозоғистон биринчи президенти Нурсултон Назарбоевни қабул қилди. Путин уни анчадан буён таклиф қилиб келаётганини айтди. Сиёсатчилар икки мамлакат ҳамкорлиги ва коронавирус билан боғлиқ вазиятни муҳокама қилди.
Назарбоев Қозоғистон ва Россиянинг ўзаро алоқаларини давлатлараро муносабатларнинг намунаси деб атади. «Бизнинг муносабатларимиз тарихи, Россия ва Қозоғистон ўртасидаги муносабатлар шунчалик барқарорки, улар, эҳтимол, давлатлараро муносабатларнинг намунасидир. Мен ушбу йўналишни сақлайман», — деди Назарбоев.
Шунингдек, у пандемия пайтида Қозоғистонга ёрдам бергани учун Россияга миннатдорчилик билдирди.
«Пандемия пайтида Россия бутун Қозоғистонни вакциналар, дори-воситалари ва ҳоказолар билан қўллаб-қувватлагани учун шахсан ўз миннатдорчилигимни билдирмоқчиман. Ёдингизда бўлса, биз Санкт-Петербургдаги кўргазмага боргандик, ўшанда қўшма корхона тўғрисида келишиб олгандик. Ҳозир Қарағандадаги ушбу қўшма корхона Россия вакцинаси билан бир хил сифатда ва йирик ҳажмда вакцина ишлаб чиқаради», — деди Қозоғистоннинг собиқ президенти.
Шунингдек, Назарбоев россиялик шифокорлар гуруҳи уни коронавирусдан халос қилганини айтди.
«Касал бўлиб қолганимда россиялик шифокорлар гуруҳи ўн кун ёнимдан жилмади. Бу менинг тузалишимда ҳал қилувчи омил бўлди, мен буларни унутмайман», — деди Назарбоев.
Қозоғистоннинг биринчи президенти, ҳукмрон «Нур Отан» партиясининг раиси ва Хавфсизлик кенгаши раҳбари Нурсултон Назарбоевга 2020 йилнинг 18 июнида коронавирус ташхиси қўйилган эди. Ўшанда 79 ёшли сиёсатчи ўзини изоляцияга олиб, ишлашни давом эттирди. 2020 йил 2 июлда у COVID-19’дан тузалди.
2021 йилнинг 25 июнида Назарбоев Қарағанда фармацевтика заводида ишлаб чиқарилган Россиянинг «Спутник V» вакцинаси билан эмланди.
Изоҳ (0)