Tojikiston prezidenti Emomali Rahmon 30-iyun kuni Afg‘oniston Milliy Kengashi raisi Mir Rahmon Rahmoniy bilan uchrashuv o‘tkazdi. Bu haqda Asia-Plus xabar berdi.
Suhbat chog‘ida Tojikiston rahbari Afg‘onistonda davom etayotgan tartibsizliklar bilan bog‘liq holda, xalqaro hamjamiyatni tashvishga solayotgan ushbu qo‘shni mamlakatdagi siyosiy va harbiy vaziyatning keskinlashuvi xavfsizlik sohasida ikki davlat o‘rtasida amaliy hamkorlikni talab qilishini aytdi.
Shuningdek, terrorchilar va giyohvand moddalar savdosi bilan shug‘ullanadigan uyushgan jinoiy guruhlarga qarshi samarali choralar ko‘rish zarurligi ta’kidlandi.
Uchrashuvda mamlakatlar o‘rtasidagi siyosat, mudofaa, iqtisodiyot, savdo, fan, ta’lim, ommaviy axborot vositalari va sog‘liqni saqlash sohalaridagi boshqa hamkorlik jarayonlari, xususan, parlament aloqalari ham muhokama qilindi.
“Biz tinchlik va barqarorlikni hamda respublika iqtisodiyotini tiklash yo‘lida tilimiz, madaniyatimiz mushtarak bo‘lgan do‘stona mamlakat hukumati va xalqining tashabbuslari hamda harakatlarini har doim qo‘llab-quvvatlaymiz”, — dedi Emomali Rahmon. “Tojikiston xalqi nafaqat geografik nuqtayi nazardan, balki umumiy qadriyatlar nuqtayi nazaridan hamisha Afg‘oniston xalqi tomonida bo‘ladi”.
Tomonlar, shuningdek, energetika, yangi transport koridorlarini tashkil etish va qo‘shma dasturlarni amalga oshirish kabi har ikki mamlakat uchun ustuvor va o‘zaro manfaatli sohalarda aloqalarni kengaytirish bo‘yicha fikr almashdi.
Izoh (0)