Italiya o‘z harbiy kontingentini Afg‘onistondan olib chiqish operatsiyasini yakunladi. Bu haqda 30-iyun kuni Italiya mudofaa vaziri Lorenso Guerini ma’lum qildi, deb yozadi “Interfaks”.
Vazirning ta’kidlashicha, buyog‘iga Italiya Afg‘oniston hukumatiga qo‘shinlarisiz yordam berishda davom etadi.
Italiya Afg‘onistondagi NATO missiyasining eng faol ishtirokchilaridan biri bo‘lgan. Mudofaa vazirligining ma’lumotlariga ko‘ra, Afg‘oniston hududida, taxminan, 20 yil davom etgan harbiy xizmat davomida Italiya harbiylarining 53 nafari qurbon bo‘lgan, yana 723 kishi jarohat olgan. Umuman olganda, bu vaqt ichida Afg‘onistonda 50 ming italiyalik harbiy xizmat qilgan.
Iyun oyi boshida AQSh Afg‘onistondan o‘z qo‘shinlarining uchdan bir qismini olib chiqib ketgani xabar berilgandi. Shuningdek, Afg‘onistondagi NATO missiyasi tugagandan so‘ng Turkiya harbiy kuchlari Kobul aeroporti xavfsizligini ta’minlashda yetakchi rolni egallashi haqida AQSh va Turkiya prezidentlari Jo Bayden va Rajab Toyyib Erdo‘g‘on kelishib olgan edi.
Eslatib o‘tamiz, aprel oyida AQSh prezidenti Jo Bayden Afg‘onistondan Amerika qo‘shinlarini olib chiqib ketish boshlanganini e’lon qilgan edi. Uning so‘zlariga ko‘ra, harbiylar mintaqada ularning oldiga qo‘yilgan barcha maqsadlarga erishgan. Qurolli Kuchlarni 11-sentabrgacha to‘liq chiqarib ketish rejalashtirilgan. Amerika va NATO mamlakatlari qo‘shinlari 29-apreldan chiqib ketishni boshladi. Ayni vaqtda AQSh davlat kotibi Entoni Blinken Afg‘onistondan qo‘shinlar chiqarib ketilgach, mamlakatda hokimiyat tepasiga “Tolibon” jangarilari kelishi mumkinligini istisno qilmadi.
Izoh (0)