O‘zbekistondagi chorraha va yo‘llarda radar va kameralar qo‘yish joylari auksion orqali savdoga qo‘yilishi boshlangani to‘g‘risida xabar berilgandi. “E-auksion” saytida birinchi bor Toshkent shahrida radar o‘rnatiladigan joylar auksionga chiqarildi.
Keltirilgan ma’lumotlarga ko‘ra, poytaxt ko‘chalarida radar o‘rnatish mumkin bo‘lgan joylarning narxi 2,4—36,5 million so‘m etib belgilangan. Xususan, Bektemir tumanida — 7 ta, Yakkasaroy tumanida — 16 ta, Mirobod tumanida esa 15 ta radar va kamera o‘rnatish joylari auksionga qo‘yilgan.
Eng arzon joy Yakkasaroy tumanida, eng qimmat joy sifatida esa Mirobod tumani Hamid Olimjon nomidagi maydon yaqinidagi ko‘prik osti ko‘rsatilgan.
Eslatib o‘tamiz, 2020-yil dekabr oyida “Davlat tomonidan tartibga solinadigan sohalarga xususiy sektorni jalb etish bo‘yicha qo‘shimcha chora-tadbirlar to‘g‘risida”gi Prezident qarori qabul qilingandi. Qarorga ko‘ra, maxsus avtomatlashtirilgan foto va video qayd etish dasturiy texnik vositalari o‘rnatiladigan joylarni tadbirkorlarga biriktirish elektron auksion savdolari orqali amalga oshiriladi.
Bundan avval O‘zbekistonda tadbirkorlarning radar o‘rnatishiga ruxsat beriladigan hududlarning auksion narxlari e’lon qilingani hamda O‘zbekistonda “parkovka” qoidalarini buzganlik uchun jarima miqdori qanchaga pasaytirilayotgani haqida xabar berilgandi.
Izoh (0)