2021-yilning dastlabki besh oyi davomida O‘zbekistonda 2960 ta yo‘l-transport hodisasi qayd etilgan bo‘lib, ular oqibatida 770 kishi halok bo‘lgan va 2365 kishi jarohat olgan. Bu haqda IIV YHXBB axborot xizmatiga tayanib, “Gazeta.uz” xabar berdi.
Avariyalarning eng ko‘pi Farg‘ona viloyati hisobiga to‘g‘ri kelmoqda — 458 ta. Toshkent viloyatida 410 ta YTH qayd etilgan bo‘lsa, Toshkent shahrida ushbu ko‘rsatkich 373 tani tashkil etgan. Shuningdek, Samarqand viloyati — 310 ta, Namangan viloyatida — 303 ta, Andijon viloyatida — 243 ta, Qashqadaryo viloyati — 171 ta, Qoraqalpog‘iston Respublikasida — 160 ta, Surxondaryo viloyatida — 110 ta, Buxoro viloyatida — 109 ta, Navoiy viloyatida — 97 ta, Jizzax viloyatida — 85 ta, Xorazm viloyatida — 78 ta va Sirdaryo viloyatida 53 ta YTH sodir etilgan.
Jami avariyalarning 1249 tasi piyodalar, 396 tasi — bolalar, 233 tasi — velosipedchilar va 22 tasi mototsikl haydovchilar ishtirokida sodir bo‘lgan. YTHlarning 1070 tasi shahar ko‘chalarida, 962 tasi — davlat ahamiyatiga ega yo‘llarda, 469 tasi — xalqaro va yana 469 tasi — mahalliy darajadagi yo‘llarda qayd etilgan.
Yo‘l-transport hodisalarining aksariyati 28—32 yosh oralig‘idagi haydovchilar tomonidan sodir etilgan — 630 ta. 23—27 yosh oralig‘idagi haydovchilar — 595 ta, 33—37 yosh — 464 ta, 47 va undan katta yoshdagilar esa 428 ta YTH sodir etgan. 18—22 yosh oralig‘idagi haydovchilar — 331 ta, 38—42 yoshlilar — 292 ta, 43—47 yoshlilar hisobida esa 220 ta avariya qayd etilgan. Erkak haydovchilar ishtirokidagi YTHlar soni 2894 ta bo‘lsa, ayollar ishtirokidagi 66 tani tashkil etmoqda.
Yo‘l-transport hodisalarining sodir etilishiga asosan tezlikni belgilangan me’yordan oshirilishi subyektiv sabab sifatida ko‘rsatilmoqda — 27,7 foiz. Qolgan sabablar orasidan ustuvorlikka ega transport vositasiga yo‘l bermasik (11,6 foiz), haydovchining tajribasizligi (6,9 foiz), avtomobil rulida uxlab qolish (6,3 foiz) va mast holda avtomobil boshqarish (2,6 foiz) o‘rin olgan.
YTHlarning obyektiv sababi sifatida (yo‘llarni rejalashtirishdagi kamchiliklar tufayli) piyodalar tomonidan yo‘lning belgilanmagan qismidan kesib o‘tishi — 15,4 foiz, yo‘llarda yo‘nalishlarni ajratib turuvchi chiziqlar yo‘qligi sabab qarama-qarshi yo‘nalishga chiqib ketish (9,7 foiz), harakatni tashkillashtirishdagi kamchiliklar va yo‘llarning nosozligi (4,6 foiz) hamda velosipedda harakatlanish uchun jihozlanmagan joylarda velosipedchilarni urib yuborish (3,8 foiz) keltirilgan.
Eslatib o‘tamiz, O‘zbekistonda 2020-yilda yo‘l-transport hodisalari oqibatida jami 1962 kishi halok bo‘lgan. Ta’kidlanishicha, ushbu ko‘rsatkich 2019-yilga nisbatan 6,3 foizga kam. Ya’ni 2019-yilda yo‘l-transport hodisalari oqibatida halok bo‘lganlar soni 2094 nafarni tashkil etgan.