Интернет тармоғида Тошкент шаҳар ИИББ хизмат автомобили ҳуқуқбузарни таъқиб қилаётгани акс этган видео тарқалди. Тошкент шаҳар ИИББ видео бўйича изоҳ берди.

Қайд этилишича, 2021 йил 29 июнь куни, тахминан, соат 02:30 да Олмазор туманидаги Кичик ҳалқа автомобиль йўлида Тошкент шаҳар ИИББ ЙҲХБ ЙПХ инспектори кичик сержант Э.Расулов хизмат олиб бориши давомида Matiz русумли автомобилнинг (давлат рақами 90 N 480 FA) ҳаракатлари унинг эътиборини тортган.

Инспектор жезл ва ҳуштак орқали ҳайдовчига тўхташ ишорасини кўрсатган. Аммо ҳайдовчи инспекторнинг қонуний талабига бўйсунмасдан, ҳаракатни давом эттирган ва бу билан Маъмурий жавобгарлик тўғрисидаги кодекснинг 194-моддасида (ички ишлар органлари ходимининг қонуний талабларини бажармаслик) қайд этилган ҳуқуқбузарликни содир этди.

Шу сабабли Вазирлар Маҳкамасининг 2018 йил 1 декабрдаги 975-сонли қарорининг 3-боби 12-банди асосида «транспорт воситасини таъқиб қилиш ёки кузатиш» ҳамда «жиноят содир этганликда гумон қилинаётган шахсларни, транспорт воситасида ҳуқуқбузарлик содир этиб, ҳодиса жойидан яширинган, ЙПХ ходимининг қонуний талабига бўйсунмаган транспорт воситаларини ушлаб туриш» ҳуқуқи берилгани боис Тошкент шаҳар ИИББ ходими ўзига бириктирилган хизмат автомобилида юқоридаги автомобилни таъқиб қила бошлаган.

Ҳаракатланиш давомида Matiz автомобили бошқарувни йўқотиб, Cobalt автомобилига (давлат рақами 01 E 455 LB) тўқнашган ва қонун талабларини бузган ҳолда воқеа жойини тарк этган. Бу билан у Маъмурий жавобгарлик тўғрисидаги кодекснинг 137-моддасида (йўл-транспорт ҳодисаси юз берган жойдан кетиб қолиш) назарда тутилган ҳуқуқбузарликни содир этган.

Мазкур ЙТҲда ҳеч ким жабрланмаган.

Бироқ шундан кейин ҳам Matiz ҳайдовчиси жавобгарликдан қочиш мақсадида қарама-қарши ҳаракат йўлига чиқиб, атрофдаги транспорт воситалари учун хавф туғдирган ва Маъмурий жавобгарлик тўғрисидаги кодекснинг 128-5-моддасини (транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши) бузган.

Кўрилган чоралар натижасида Matiz автомобили тўхтатилган. Уни бошқарган 2004 йилда туғилган З.А.нинг ҳайдовчилик гувоҳномаси ва бошқа ҳужжатлари йўқ экани аниқланган.

Ҳозирги вақтда мазкур ҳолат бўйича суриштирув ишлари олиб борилмоқда. Автомобиль Маъмурий жавобгарлик тўғрисидаги кодекснинг 291-моддаси 1-қисми «а» бандига мувофиқ жарима майдончасига жойлаштирилди.

Шунингдек, Тошкент шаҳар ИИББ ходимлари видео муаллифининг хатти-ҳаракатларига ҳуқуқий баҳо берилиши ҳамда текширув якуни бўйича унга нисбатан қонуний чоралар кўрилиши қайд этилган.