Samarqand viloyati Oqqo‘rg‘on tumanida Toshkent tibbiyot akademiyasiga 7 ming dollarga o‘qishga kiritib qo‘ymoqchi bo‘lgan ikki shaxs qo‘lga olindi. Bu haqda IIV Jinoyat qidiruv bosh boshqarmasi Korrupsiya va iqtisodiy jinoyatlarga qarshi kurashish boshqarmasi xabar berdi.
Ma’lum qilinishicha, 26-iyun kuni Samarqand viloyat IIBga fuqarolar R.Sh. va M.M. ariza bilan murojaat qilib, unda Oqdaryo tumanida yashovchi Hasan va Akmal ismli shaxslar R.Sh.ni Toshkent tibbiyot akademiyasiga o‘qishga kiritib berishini va’da qilib, evaziga 7 ming dollar talab qilganini bildirgan.
Mazkur arizaga asosan shu kuni IIV JQBB Korrupsiya va iqtisodiy jinoyatlarga qarshi kurashish boshqarmasi hamda Samarqand viloyati IIB JQB Korrupsiya va iqtisodiy jinoyatlarga qarshi kurashish bo‘limi xodimlari hamkorligida tezkor tadbir o‘tkazilgan.
Samarqand shahridagi xususiy o‘quv markazi rahbari B.A. xizmat xonasida ariza muallifi R.Sh. va M.M.dan 7 ming dollar miqdoridagi pullarni olgan vaqt ashyoviy dalillar bilan ushlangan. Ko‘rilgan choralar natijasida uning jinoiy sherigi ham qo‘lga olingan.
Mazkur holat yuzasidan, 2021-yil 26-iyun kuni Oqdaryo tumani IIB huzuridagi Tergov bo‘linmasi tomonidan Jinoyat kodeksining 168-moddasi (firibgarlik) 3-qismi “a” bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq Chirchiq davlat pedagogika institutiga o‘qishga kiritib qo‘yish uchun ikki kishidan 9 ming dollar olgan yana bir shaxs ushlangani, Qoraqalpoq davlat universitetiga o‘qishga kiritib qo‘yish uchun 25 mln so‘m talab qilgan assistent qo‘lga olingani to‘g‘risida xabar berilgandi.
Izoh (0)