Sirdaryo viloyatining Xovos tumanida 3 nafar fuqaroni Guliston davlat universitetiga o‘qishga kiritib qo‘yish uchun ulardan 6,4 ming dollar pul olgan shaxslar ushlandi. Bu haqda Bosh prokuratura huzuridagi departament xabar berdi.

Ma’lum qilinishicha, Bosh prokuratura huzuridagi departamentning Xovos tuman bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan.

Xovos tumanida yashovchi fuqaro O.A. va boshqalar oldindan til biriktirib, 3 nafar fuqaroni o‘zlarining Guliston davlat universitetida ishlovchi Sh. ismli tanishi orqali universitetning sirtqi bo‘limiga o‘qishga kiritib qo‘yishni va’da qilgan. Buning evaziga ulardan 6,4 ming dollar qo‘lga kiritgan.

Bundan tashqari, qo‘lga olingan shaxslar fuqaro Z.A.ga 3,5 million so‘m va U.M.ga 9,1 million so‘m pulni “kontrakt to‘lovlari” uchun to‘latib, ularga talabalar safiga qabul qilingani to‘g‘risida soxta buyruqlarni taqdim etgani aniqlangan.

Mazkur holat yuzasidan Jinoyat kodeksining 168-moddasi (firibgarlik) 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Toshkent davlat yuridik universitetiga kiritib qo‘yish uchun 10 ming dollar so‘ragan shaxs ushlangani, Farg‘onada Koreyadagi universitetga imtihonsiz kiritib qo‘yishni va’da qilib, maktab o‘quvchilaridan jami 20 mln so‘m olgan shaxslar aniqlangani, TATUning Samarqand filiali bo‘limi boshlig‘i 3 ming dollar pora bilan qo‘lga tushgani to‘g‘risida xabar berilgandi.