Самарқанд вилояти Оққўрғон туманида Тошкент тиббиёт академиясига 7 минг долларга ўқишга киритиб қўймоқчи бўлган икки шахс қўлга олинди. Бу ҳақда ИИВ Жиноят қидирув бош бошқармаси Коррупция ва иқтисодий жиноятларга қарши курашиш бошқармаси хабар берди.
Маълум қилинишича, 26 июнь куни Самарқанд вилоят ИИБга фуқаролар Р.Ш. ва М.М. ариза билан мурожаат қилиб, унда Оқдарё туманида яшовчи Ҳасан ва Акмал исмли шахслар Р.Ш.ни Тошкент тиббиёт академиясига ўқишга киритиб беришини ваъда қилиб, эвазига 7 минг доллар талаб қилганини билдирган.
Мазкур аризага асосан шу куни ИИВ ЖҚББ Коррупция ва иқтисодий жиноятларга қарши курашиш бошқармаси ҳамда Самарқанд вилояти ИИБ ЖҚБ Коррупция ва иқтисодий жиноятларга қарши курашиш бўлими ходимлари ҳамкорлигида тезкор тадбир ўтказилган.
Самарқанд шаҳридаги хусусий ўқув маркази раҳбари Б.А. хизмат хонасида ариза муаллифи Р.Ш. ва М.М.дан 7 минг доллар миқдоридаги пулларни олган вақт ашёвий далиллар билан ушланган. Кўрилган чоралар натижасида унинг жиноий шериги ҳам қўлга олинган.
Мазкур ҳолат юзасидан, 2021 йил 26 июнь куни Оқдарё тумани ИИБ ҳузуридаги Тергов бўлинмаси томонидан Жиноят кодексининг 168-моддаси (фирибгарлик) 3-қисми «а» банди билан жиноят иши қўзғатилиб, дастлабки тергов ҳаракатлари олиб борилмоқда.
Аввалроқ Чирчиқ давлат педагогика институтига ўқишга киритиб қўйиш учун икки кишидан 9 минг доллар олган яна бир шахс ушлангани, Қорақалпоқ давлат университетига ўқишга киритиб қўйиш учун 25 млн сўм талаб қилган ассистент қўлга олингани тўғрисида хабар берилганди.
Изоҳ (0)