Rossiyada 22 yoshli O‘zbekiston fuqarosi balandlikdan yiqilib, halok bo‘lgani haqida xabar berilgandi. Ushbu xabar yuzasidan Tashqi mehnat migratsiyasi agentligi bayonot berdi.
Qayd etilishicha, 1998-yilda Samarqand viloyatida tug‘ilgan A.Fayziyev Rossiyaning Leningrad viloyati Vsevoloj tumanidagi qurilish korxonasida vaqtinchalik mehnat faoliyatini amalga oshirgan.
2021-yilning 17-iyun kuni ish vaqtida texnik xavfsizlik qoidalariga rioya qilmagani sababli balandlikdan yiqilib tushgan va oradan 4 kun o‘tib, 21-iyun kuni shifoxonada vafot etgan.
Tashqi mehnat migratsiyasi agentligi tomonidan ish beruvchi bilan olib borilgan muzokaralar natijasida A.Fayziyevning jasadini Vatanga qaytarish va kompensatsiya pullari to‘liq undirildi.
Tashqi mehnat migratsiyasi agentligining Sankt-Peterburg shahridagi vakolatxonasi tomonidan marhumning jasadi 25-iyun kuni Sankt-Peterburg–Toshkent yo‘nalishida O‘zbekistonga olib kelindi.
Baxtsiz hodisa yuzasidan Rossiya huquqni muhofaza qiluvchi organlari tomonidan jinoyat ishi ochilgan bo‘lib, tergov harakatlari olib borilmoqda.
Bundan avval Ikkinchi jahon urushi vaqtida bedarak yo‘qolgan o‘zbek askarining xoki vatanga olib kelingani, Rossiyada majburiy mehnatdan qochib, ikki oyog‘idan ajralgan O‘zbekiston fuqarosiga yordam ko‘rsatilgani hamda Tataristonda o‘zbekistonlik talaba 5-qavatdan yiqilib, halok bo‘lgani haqida xabar berilgandi.
Izoh (0)