O‘zbekistonda 22-iyundan jamoat transportiga niqobsiz chiqish taqiqlangan. Bu talab qanchalik bajarilyapti? (foto)

Koronavirusga qarshi kurash bo‘yicha Respublika maxsus komissiyasi qarori bilan O‘zbekistonda yo‘nalishli avtobus haydovchilari (konduktorlari) va metro kuzatuvchilari niqobsiz bo‘lgan shaxslarni transport vositalari saloniga chiqarmaslik (kiritmaslik) choralarini ko‘rishi belgilangan. Komissiyaning bunday talabi 22-iyun kuni ma’lum bo‘lgan edi.

“Daryo” muxbirlari va mushtariylarining ma’lum qilishicha, metro bekatlariga kirishda aksariyat hollarda yo‘lovchilardan tibbiy niqoblarni taqib olish so‘ralmoqda. Bekatlarning o‘zida esa niqob taqmagan yoki niqobni burnidan tushirib, iyagiga taqib olgan yo‘lovchilarni yetarlicha ko‘p uchratish mumkin. Yo‘nalishli avtobuslarda esa tibbiy niqob taqish talabining bajarilishi haminqadar — avtobuslardagi niqobsiz yo‘lovchilar soni metrodagidan sezilarli ko‘p.

Mas’ullar oldiga niqobsiz yo‘lovchilarni jamoat transportiga chiqarmaslik talabi qo‘yilgan, ammo niqobsiz yo‘lovchilarni niqob bilan ta’minlash vazifasi qo‘yilmagan — metropolitenda ham, avtobuslarda ham (agar qoidalar bajarilishini qat’iy talab qiladigan avtobuschilar uchrab qolsa) niqobsiz yo‘lovchilarga na bepul, na pulga niqob taklif qilinmoqda. Masalan, metroda niqobsizlar shunchaki bekatga kiritilmayapti.

Metropolitendan foydalanuvchi “Daryo” xodimlaridan birining so‘zlariga ko‘ra, “Do‘stlik-2” bekatidan “Do‘stlik” bekatiga o‘tish joyida so‘nggi vaqtlarda birinchi marta aynan 28-iyun, dushanba kuni (karantin talablari nisbatan kuchaytirilgan sana) ichki ishlar organlari xodimlari tomonidan “tibbiy niqoblarni to‘g‘ri taqib olish” talabi ilgari surilgan. Toshkent metrosining yo‘lovchilar oqimi eng katta bekatlaridan biri “Chilonzor”da esa shu kuni niqob taqib olish so‘ralmagan.

Uchtepa tumanida yashovchi xodimlardan birining hikoya qilishicha, u qatnovchi avtobus konduktori “Chilonzor” metrosi oldidagi shohbekatga yaqinlashganida “bu yerda tekshiruv bor”ligi sabab yo‘lovchilardan niqoblarni taqib olishni so‘ragan. E’tiborga molik tomoni, rasmiylar transportda niqobsiz yurishni taqiqlamoqda, biroq pandemiya sharoitida transport qatnovini yanada yaxshilash (va shu orqali jamoat transportidagi tiqilinchlarning oldini olish) choralarini ko‘rmayapti. So‘nggi oylar davomida Toshkentda bir qator markaziy avtobus yo‘nalishlarining, shuningdek, Toshkent metrosida harakat intervallari uzaygan.

2020-yil oktabrida Toshkentda “turli yuqumli mavsumiy infeksiyalar tarqalishining oldini olish va yo‘lovchilar salomatligini asrash maqsadida” shahar jamoat transporti (avtobus, metro, “marshrutka”lar) xizmatidan foydalanganda yo‘lovchilarning tibbiy niqob va qo‘lqopda bo‘lish tartibi joriy etilgan va yo‘lovchilarga har kuni salkam 17 million so‘mlik qo‘lqoplar bepul tarqatilgan edi. Rasmiylarning ushbu tashabbusi jamoatchilik tomonidan keskin tanqid ostiga olingan edi.