The Telegraph: Britaniya harbiy kemasi bosh vazirning qarori bilan Qrim sohillari yaqinidan suzib o‘tgan

Buyuk Britaniyaning Defender esminetsi (harbiy kemasi)ni Qrim sohillari yaqinidan o‘tkazish qarori shaxsan Britaniya bosh vaziri Boris Jonson tomonidan qabul qilingan va voqeadan ikki kun oldin harbiy qo‘mondonlikka yuborilgan. Bu haqda mamlakat Mudofaa vazirligidagi manbalariga tayanib, The Daily Telegraph xabar berdi.

Nashrning ta’kidlashicha, esminetsning harakat yo‘nalishi mudofaa vaziri Ben Uolles tomonidan ishlab chiqilgan va taklif qilingan. Biroq Britaniya tashqi ishlar vaziri Dominik Raab rejaga qarshi chiqqan, u voqeadan Moskva o‘z manfaatlari yo‘lida foydalanishi mumkin deb hisoblagan.

Natijada, yakuniy qaror chiqarish bosh vazirga topshirilgan, u esa 21-iyun kuni “kemaning ushbu suvlar orqali tinch yo‘l bilan o‘tishiga” ruxsat bergan. Jonsonning o‘zi va uning vakillari buni hali rasman tasdiqlamagan.

Eslatib o‘tamiz, 23-iyun kuni Rossiya Mudofaa vazirligi Britaniyaning Defender esminetsi Qora dengizda Rossiya chegarasini buzib kirganini ma’lum qildi. Hodisa Qrimdagi Fiolent burni yaqinida yuz bergan.

Vazirlik talqiniga ko‘ra, kema Rossiya qirg‘oq bo‘yi suvlariga 11:52 da kirgan. U chegaralarni buzgan taqdirda, qurol qo‘llanilishi haqida ogohlantirilgan, ammo unga javob qilmagan. Shundan keyin chegara soqchi kemasi ogohlantiruvchi o‘t ochgan, 12:19 da esa Su-24M samolyoti esminets tomonga qarata “ogohlantiruvchi bomba tashlash”ni amalga oshirgan. Yana to‘rt daqiqadan keyin Defender Rossiya hududiy suvlarini tark etgan.

Rossiya Mudofaa vazirligi esminetsning xatti-harakatlarini BMTning dengiz huquqi bo‘yicha Konvensiyasining buzilishi deb baholadi; Rossiya Tashqi ishlar vazirligi esa hodisani “qo‘pol provokatsiya” deb atab, idora Buyuk Britaniyaning Moskvadagi elchisini chaqirishini ma’lum qildi.

Rossiyaning Qrim ustidan suverenitetini tan olmayotgan Buyuk Britaniya talqini bo‘yicha esminets “xalqaro huquqqa muvofiq Ukraina hududiy suvlari orqali hech nimani buzmasdan o‘tish”ni amalga oshirgan.