Bugun,

  • USD 11095.31
  • RUB 173.84
  • EUR 10772.44

Fors ko‘rfazida Eron Islom inqilob gvardiyasi korpusining (IIGK) uchta qayig‘i tezlik bilan AQShning ikkita harbiy kemasiga yaqinlashgani sababli kemalardan biri ogohlantiruvchi o‘t ochdi. Bu haqda AQSh harbiy dengiz kuchlari ma’lum qildi, deb yozadi “RBK”.

Foto: “TASS”

Foto: “TASS”

“Qayiqlar katta tezlikda AQSh dengiz floti patrul kemasi Firebolt va Sohil xavfsizligini qo‘riqlash kemasi Baranoff’ga noma’lum niyat bilan 68 yard (taxminan, 62 metr) yaqinlashdi. Amerika kemalari xalqaro suvlarda dengiz xavfsizligini ta’minlash bo‘yicha operatsiyalarni olib borayotgan edi”, —  deya ta’kidladi AQSh harbiylari.

Xabarga ko‘ra, ekipajlar radioaloqa va karnay orqali bir nechta ogohlantirishlar yubordi, ammo IIGK dengiz kemalari yaqin masofada harakat qilishda davom etdi. Shundan so‘ng Firebolt ekipaji ogohlantiruvchi o‘q uzdi va IIGK qayiqlari xavfsiz masofaga chekindi.

The Wall Street Journal nashrining yozishicha, bu Fors ko‘rfazida bir oy ichida sodir bo‘lgan ikkinchi shunday hodisa. Nashrning ta’kidlashicha, 2-aprel kuni uchta tezyurar jangovar qayiq va IIGK yordamchi kemasi ko‘rfazning janubiy qismida AQSh Sohil xavfsizligi xizmatining ikkita kemasini qurshab olgan va uch soat davomida ularni kuzatib borgan. So‘ng Amerika kemalarining ekipajlari ogohlantiruvchi o‘q otgan. Ushbu ma’lumot AQSh dengiz kuchlari tomonidan tasdiqlandi.

AQSh IIGK dengiz kuchlarini dengizdagi keskinlikni oshirmaslikka chaqirdi.

“Albatta, biz ziddiyatlarning pasayishi tarafdorimiz, anglashilmovchiliklarni xohlamaymiz”, — dedi AQSh Mudofaa vazirligining matbuot kotibi Jon Kirbi. Uning so‘zlariga ko‘ra, dengizdagi ziddiyatli vaziyatni aynan IIGK dengiz kuchlari yaratmoqda, Eron davlat dengiz kuchlari tomonidan esa bu kabi harakatlar kuzatilmagan.

“Biz Eron davlat dengiz kuchlaridan bunday xatti-harakatlarni ko‘rmayapmiz, bular, asosan, IIGK va ularning tezyurar qayiqlari tomonidan amalga oshirilmoqda”, — dedi Kirbi.

AQSh Mudofaa vazirligi vakili Eronda “ideal monolit qo‘mondonlik” yo‘qligini aytdi. Uning so‘zlariga ko‘ra, IIGK oliy rahbarga bo‘ysunadi va “bu harakatlar buyruq zanjiridagi alohida yo‘nalishdir”.

Izoh
Asosiy yangiliklar
Iqtisodiyot
O‘zbekistonda yanvar oyida kimlarga eng yuqori maosh taklif qilindi?
Dunyo
“Rossiya yutqazadi, Ukraina g‘alabasi dunyoni o‘zgartiradi”: Zelenskiy Buyuk Britaniya parlamentida nutq so‘zladi (video)
Mahalliy
Qoraqalpog‘istondagi uyda gaz portlashi oqibatida bir kishi vafot etdi