Буюк Британиянинг Defender эсминеци (ҳарбий кемаси)ни Қрим соҳиллари яқинидан ўтказиш қарори шахсан Британия бош вазири Борис Жонсон томонидан қабул қилинган ва воқеадан икки кун олдин ҳарбий қўмондонликка юборилган. Бу ҳақда мамлакат Мудофаа вазирлигидаги манбаларига таяниб, The Daily Telegraph хабар берди.
Нашрнинг таъкидлашича, эсминецнинг ҳаракат йўналиши мудофаа вазири Бен Уоллес томонидан ишлаб чиқилган ва таклиф қилинган. Бироқ Британия ташқи ишлар вазири Доминик Рааб режага қарши чиққан, у воқеадан Москва ўз манфаатлари йўлида фойдаланиши мумкин деб ҳисоблаган.
Натижада, якуний қарор чиқариш бош вазирга топширилган, у эса 21 июнь куни «кеманинг ушбу сувлар орқали тинч йўл билан ўтишига» рухсат берган. Жонсоннинг ўзи ва унинг вакиллари буни ҳали расман тасдиқламаган.
Эслатиб ўтамиз, 23 июнь куни Россия Мудофаа вазирлиги Британиянинг Defender эсминеци Қора денгизда Россия чегарасини бузиб кирганини маълум қилди. Ҳодиса Қримдаги Фиолент бурни яқинида юз берган.
Вазирлик талқинига кўра, кема Россия қирғоқ бўйи сувларига 11:52 да кирган. У чегараларни бузган тақдирда, қурол қўлланилиши ҳақида огоҳлантирилган, аммо унга жавоб қилмаган. Шундан кейин чегара соқчи кемаси огоҳлантирувчи ўт очган, 12:19 да эса Су-24М самолёти эсминец томонга қарата «огоҳлантирувчи бомба ташлаш»ни амалга оширган. Яна тўрт дақиқадан кейин Defender Россия ҳудудий сувларини тарк этган.
Россия Мудофаа вазирлиги эсминецнинг хатти-ҳаракатларини БМТнинг денгиз ҳуқуқи бўйича Конвенциясининг бузилиши деб баҳолади; Россия Ташқи ишлар вазирлиги эса ҳодисани «қўпол провокация» деб атаб, идора Буюк Британиянинг Москвадаги элчисини чақиришини маълум қилди.
Россиянинг Қрим устидан суверенитетини тан олмаётган Буюк Британия талқини бўйича эсминец «халқаро ҳуқуққа мувофиқ Украина ҳудудий сувлари орқали ҳеч нимани бузмасдан ўтиш»ни амалга оширган.
Мавзуга доир:
Изоҳ (0)