Toshkent shahrida kuchli ta’sir qiluvchi dorilarni noqonuniy ravishda sotgan bir qator dorixonalar aniqlandi, deya xabar bermoqda Sog‘liqni saqlash vazirligi matbuot xizmati.
Aniqlanishicha, Yunusobod tumani Osiyo ko‘chasida joylashgan “Aziza pharmacy plus” MChJ, Chilonzor tumanida joylashgan “Farm lyuks” MChJ, “Atsefenak farm”, “Gulshana pharm servis” MChJ, Uchtepa tumanida joylashgan “Impulus farm trade”, “City open”, “Farm standart Navoiy” MChJ, Shayxontohur tumanida joylashgan “Salus oniko” MChJga qarashli qator dorixonalarda kuchli ta’sir qiluvchi dori vositalarining noqonuniy savdosi amalga oshirilgan.
“Ayni paytda huquqni muhofaza qiluvchi organlar tomonidan qonunda belgilangan tartibda mazkur dorixonalar egalarini javobgarlikka tortish choralari ko‘rilmoqda. Farmatsevtika tarmog‘ini rivojlantirish agentligiga ular bo‘yicha taqdimnomalar kiritilgach, belgilangan tartibda dorixonalar litsenziyasi olib qo‘yiladi hamda 3 yil davomida javobgar shaxsga litsenziya berilishi va muassasada dori-darmon savdosining amalga oshirilishi taqiqlanadi”, — dedi Farmatsevtika sanoatini rivojlantirish agentligi Toshkent bo‘limi rahbari Ulug‘bek Jumaniyozov.
Uning so‘zlariga ko‘ra, kuchli ta’sir qiluvchi dori vositalari aholi soni va kasallanish darajasining uch yillik statistikasiga qarab, eksport qilinadi.
“Masalan, birgina ‘Tropikamid’ dori vositasini oladigan bo‘lsak, ushbu preparat ko‘z kasalliklari shifoxonalarida diagnostika qilish va boshqa muolajalarda ishlatiladi. Ushbu farmatsevtik mahsulot ijtimoiy dorixonalarga qat’iy belgilangan miqdorda olib kelinadi va bemorlarga faqatgina retsept asosida beriladi. Ko‘cha-ko‘yda va ayrim dorixonalarda noqonuniy sotilayotgan kuchli ta’sir qiluvchi dori vositalari yurtimizga kontrabanda usulida olib kiriladi va sotiladi”, — dedi ekspert.
Eslatib o‘tamiz, 2019-yil 6-sentabrda Shavkat Mirziyoyevning “Dori vositalari noqonuniy aylanishining oldini olish choralarini kuchaytirish to‘g‘risida”gi qarori qabul qilingan. Unga ko‘ra, 2019-yil 1-dekabrdan boshlab tarkibida kuchli ta’sir qiluvchi moddalar mavjud bo‘lgan dori vositalarining chakana realizatsiyasi (berilishi) faqat ijtimoiy dorixonalar, shuningdek, giyohvandlik vositalari va psixotrop moddalarni saqlash va realizatsiya qilish (berish) faoliyatiga litsenziyasi bo‘lgan dorixonalar tomonidan amalga oshirilishi belgilangan.
Bundan avval Uchtepa aholisi ichki ishlar vaziriga murojaat qilib, tumanda fohishalar va giyohvandlar ko‘payganiga chora ko‘rishni so‘ragani, Toshkentga kuchli ta’sir qiluvchi moddalar olib kirmoqchi bo‘lgan shaxs qo‘lga olingani hamda Toshkentda kuchli ta’sir qiluvchi dori vositalari savdosi bilan shug‘ullangan jinoiy guruh qo‘lga olingani haqida xabar berilgandi.
Izoh (0)