Тошкент шаҳрида кучли таъсир қилувчи дориларни ноқонуний равишда сотган бир қатор дорихоналар аниқланди, дея хабар бермоқда Соғлиқни сақлаш вазирлиги матбуот хизмати.
Аниқланишича, Юнусобод тумани Осиё кўчасида жойлашган «Aziza pharmacy plus» МЧЖ, Чилонзор туманида жойлашган «Фарм люкс» МЧЖ, «Ацефенак фарм», «Gulshana pharm servis» МЧЖ, Учтепа туманида жойлашган «Impulus farm trade», «City open», «Фарм стандарт Навоий» МЧЖ, Шайхонтоҳур туманида жойлашган «Салус онико» МЧЖга қарашли қатор дорихоналарда кучли таъсир қилувчи дори воситаларининг ноқонуний савдоси амалга оширилган.
«Айни пайтда ҳуқуқни муҳофаза қилувчи органлар томонидан қонунда белгиланган тартибда мазкур дорихоналар эгаларини жавобгарликка тортиш чоралари кўрилмоқда. Фармацевтика тармоғини ривожлантириш агентлигига улар бўйича тақдимномалар киритилгач, белгиланган тартибда дорихоналар лицензияси олиб қўйилади ҳамда 3 йил давомида жавобгар шахсга лицензия берилиши ва муассасада дори-дармон савдосининг амалга оширилиши тақиқланади», — деди Фармацевтика саноатини ривожлантириш агентлиги Тошкент бўлими раҳбари Улуғбек Жуманиёзов.
Унинг сўзларига кўра, кучли таъсир қилувчи дори воситалари аҳоли сони ва касалланиш даражасининг уч йиллик статистикасига қараб, экспорт қилинади.
«Масалан, биргина ‘Тропикамид’ дори воситасини оладиган бўлсак, ушбу препарат кўз касалликлари шифохоналарида диагностика қилиш ва бошқа муолажаларда ишлатилади. Ушбу фармацевтик маҳсулот ижтимоий дорихоналарга қатъий белгиланган миқдорда олиб келинади ва беморларга фақатгина рецепт асосида берилади. Кўча-кўйда ва айрим дорихоналарда ноқонуний сотилаётган кучли таъсир қилувчи дори воситалари юртимизга контрабанда усулида олиб кирилади ва сотилади», — деди эксперт.
Эслатиб ўтамиз, 2019 йил 6 сентябрда Шавкат Мирзиёевнинг «Дори воситалари ноқонуний айланишининг олдини олиш чораларини кучайтириш тўғрисида»ги қарори қабул қилинган. Унга кўра, 2019 йил 1 декабрдан бошлаб таркибида кучли таъсир қилувчи моддалар мавжуд бўлган дори воситаларининг чакана реализацияси (берилиши) фақат ижтимоий дорихоналар, шунингдек, гиёҳвандлик воситалари ва психотроп моддаларни сақлаш ва реализация қилиш (бериш) фаолиятига лицензияси бўлган дорихоналар томонидан амалга оширилиши белгиланган.
Бундан аввал Учтепа аҳолиси ички ишлар вазирига мурожаат қилиб, туманда фоҳишалар ва гиёҳвандлар кўпайганига чора кўришни сўрагани, Тошкентга кучли таъсир қилувчи моддалар олиб кирмоқчи бўлган шахс қўлга олингани ҳамда Тошкентда кучли таъсир қилувчи дори воситалари савдоси билан шуғулланган жиноий гуруҳ қўлга олингани ҳақида хабар берилганди.
Изоҳ (0)