Toshkent–Qarshi yo‘nalishida harakatlanib kelayotgan “Nasaf” tezyurar elektropoyezdi 22-iyundan boshlab “Shahrisabz” temiryo‘l vokzaligacha qatnashni boshlaydi. Bu haqda “O‘ztemiryo‘lyo‘lovchi”ga tayanib, O‘zA xabar qildi.
Qayd etilishicha, bu sayyohlarga Qamashi tumanidagi “Langar-Ota” ziyoratgohiga borish uchun qulaylik yaratadi. Chunki ushbu poyezd Qamashi stansiyasida ham to‘xtab o‘tadi.
4-sonli poyezd 22-iyun kuni Toshkent markaziy temiryo‘l vokzalidan amaldagi jadvalga asosan, Qarshi temiryo‘l vokzalidan esa soat 14:27 dan boshlab “Shahrisabz” yo‘nalishiga, shuningdek, 22-iyun kuni soat 17:04 dan boshlab esa 3-sonli “Nasaf” elektropoyezdi Shahrisabz–Toshkent yo‘nalishida qatnovini amalga oshiradi.
Shu sababli Qarshi–Shahrisabz shaharlararo elektropoyezdining harakat jadvaliga ham biroz o‘zgartirish kiritiladi. Unga ko‘ra, ushbu poyezd 22-iyundan Qarshi temiryo‘l vokzalidan soat 17:29 da qatnovini amalga oshiradi.
Qo‘shimcha ma’lumotlarni Toshkent shahrida 1005 qisqa telefon raqami, joylardagi temir yo‘l kassalari hamda ma’lumotlar byurosidan bilib olish mumkin.
Bundan avval Toshkent—Hojikent poyezdlarining 23-iyungi 2 ta reysi bekor qilingani, Toshkent metrosining “Olmazor” bekatida barcha yo‘lovchilar tushirib yuborilganiga izoh berilgani hamda Navoiy—Buxoro yo‘nalishida “Afrosiyob” poyezdlari uchun qo‘shimcha yo‘l qurilayotgani haqida xabar berilmoqda.
Izoh (0)