Тошкент–Қарши йўналишида ҳаракатланиб келаётган «Насаф» тезюрар электропоезди 22 июндан бошлаб «Шаҳрисабз» темир йўл вокзалигача қатнашни бошлайди. Бу ҳақда «Ўзтемир йўлйўловчи»га таяниб, ЎзА хабар қилди.
Қайд этилишича, бу сайёҳларга Қамаши туманидаги «Лангар-Ота» зиёратгоҳига бориш учун қулайлик яратади. Чунки ушбу поезд Қамаши станциясида ҳам тўхтаб ўтади.
4-сонли поезд 22 июнь куни Тошкент марказий темир йўл вокзалидан амалдаги жадвалга асосан, Қарши темир йўл вокзалидан эса соат 14:27 дан бошлаб «Шаҳрисабз» йўналишига, шунингдек, 22 июнь куни соат 17:04 дан бошлаб эса 3-сонли «Насаф» электропоезди Шаҳрисабз–Тошкент йўналишида қатновини амалга оширади.
Шу сабабли Қарши–Шаҳрисабз шаҳарлараро электропоездининг ҳаракат жадвалига ҳам бироз ўзгартириш киритилади. Унга кўра, ушбу поезд 22 июндан Қарши темир йўл вокзалидан соат 17:29 да қатновини амалга оширади.
Қўшимча маълумотларни Тошкент шаҳрида 1005 қисқа телефон рақами, жойлардаги темир йўл кассалари ҳамда маълумотлар бюросидан билиб олиш мумкин.
Бундан аввал Тошкент—Ҳожикент поездларининг 23 июнги 2 та рейси бекор қилингани, Тошкент метросининг «Олмазор» бекатида барча йўловчилар тушириб юборилганига изоҳ берилгани ҳамда Навоий—Бухоро йўналишида «Афросиёб» поездлари учун қўшимча йўл қурилаётгани ҳақида хабар берилмоқда.
Изоҳ (0)