Ilon Maskning SpaceX kosmik kompaniyasiga tegishli Starlink sun’iy yo‘ldosh internet-loyihasi 2021-yil sentabrga kelib butun dunyoni uzluksiz va bir maromdagi internet bilan ta’minlay boshlashi kutilmoqda. Bu haqda SpaceX operatsion direktori Gvinn Shotvell ma’lum qildi, deb yozadi Reuters.
“Biz, taxminan, 1800 ta sun’iy yo‘ldoshni muvaffaqiyatli joylashtirdik va ular operatsion orbitaga kirishi bilanoq global uzluksiz internet qamroviga ega bo‘lamiz, bu taxminan sentabr oyiga to‘g‘ri keladi”, — dedi Shotvell Macquarie Group texnologik konferensiyasida
Uning qo‘shimcha qilishicha, keyinchalik kompaniya “har bir mamlakatga kirish va telekommunikatsiya xizmatlarini ko‘rsatish bo‘yicha muzokaralar olib borish uchun” nazorat qiluvchi organlar bilan ish boshlaydi.
May oyida SpaceX asoschisi Ilon Mask Starlink internet xizmatlari uchun 500 mingdan ziyod oldindan buyurtma olganini aytgandi.
2020-yil oktabr oyida SpaceX 11 mamlakat foydalanuvchilari orasida Starlink’ning beta-sinovini boshladi. Dastur qatnashchilari 499 dollarga bir qator uskunalar (terminal, ulanish moslamalari, yo‘riqnoma) olgan. Xizmat uchun obuna to‘lovi oyiga 99 dollar.
Ma’lumot uchun, 2020-yil dekabrida SpaceX Starlink loyihasi doirasida olis va qishloq joylar aholisini sun’iy yo‘ldosh internet bilan ta’minlash uchun AQSh hukumatidan 885,5 million dollar subsidiyani qo‘lga kiritdi. Kompaniya ushbu mablag‘ni o‘n yil davomida qabul qiladi. Bundan tashqari, AQSh hukumati SpaceX’ga 35 ta shtatda 642 925 ta nuqtada internet tarqatish xizmatlarini taqdim etish uchun qo‘shimcha mablag‘ ham ajratadi.
- Video: SpaceX yana 60 ta sun’iy yo‘ldoshni orbitaga chiqardi. Ular butun sayyorani internet bilan ta’minlash loyihasining bir qismidir
- SpaceX kompaniyasi bortida rekord darajada ko‘p sun’iy yo‘ldosh bo‘lgan raketani uchiradi
- Starlink’ning ilk foydalanuvchilari uni sovuq havo harorati va qorli sharoitda sinovdan o‘tkazdi. SpaceX’ning sun’iy yo‘ldosh interneti bo‘ron vaqtida ham yo‘qolmagan
Izoh (0)