Tojikistonda koronavirusga chalinish holatlari haqida rasman ma’lum qilindi. Avvalroq mamlakat COVID-19 ustidan g‘alaba qozonganini e’lon qilgandi

Tojikiston Sog‘liqni saqlash vazirligi fuqarolarga hozirgi vaqtda mamlakatda koronavirusga chalinish holatlari qayd etilganini ma’lum qiladi. Bu haqda Asia-Plus xabar berdi.

Vaziyat yuzasidan o‘tkazilgan shtab yig‘ilishida ishtirok etgan mutaxassislarning fikriga ko‘ra, kasallikning yangi avj olishiga asosiy sabab beparvolik, chet eldan qaytib kelgan fuqarolarning o‘zini yakkalash uchun belgilangan muddatlarga rioya qilmasligi, boshqa tavsiyalarga amal qilmaslik, shuningdek, niqoblardan foydalanmaslikdir.

Shu munosabat bilan, mamlakatning har bir fuqarosidan ushbu sohadagi mutaxassislarning tavsiyalariga qat’iy amal qilish, zarurat bo‘lmagan joyga bormaslik, jamoat joylarida niqobdan va boshqa dezinfeksiyalovchi vositalardan foydalanish talab etiladi.

Respublika shtabi tomonidan bir qator qarorlar qabul qilindi, xususan, tegishli vazirliklar va idoralarga aholining shaxsiy va jamoat gigiyenasi qoidalariga rioya etishini nazorat qilish, xizmat ko‘rsatish va madaniyat markazlari ustidan nazoratni amalga oshirish, qat’iy profilaktika va epidemiyaga qarshi choralar ko‘rish, sanitariya-gigiyena qoidalariga rioya qilish, tantanalar va marosimlar, dafn marosimlari paytida virus tarqalishining oldini olish va unga qarshi kurashish, shuningdek, xalqaro parvozlar paytida COVID-19 yuqtirib olish holatlarining oldini olish uchun zarur choralarni ko‘rish topshirildi.

Tojikistonda 2021- yilning 11-yanvaridan buyon koronavirusga chalinish bo‘yicha biror-bir rasmiy holat qayd etilmagan. 26-yanvar kuni prezident Emomali Rahmon mamlakat koronavirus ustidan g‘alaba qozonganini e’lon qilgan, shu bilan birga, aholini niqob rejimiga rioya qilish va masofa saqlashni unutmaslikka chaqirgan.

Iyun oyi boshida OAVda Tojikistonda koronavirus qaytadan avj olgani haqida xabarlar tarqaldi. Sog‘liqni saqlash vazirligi esa buni qat’iyan rad etdi va xabarlarni faqatgina mish-mish deb atadi.

Pandemiya boshlanganidan beri, rasmiy statistik ma’lumotlarga ko‘ra, mamlakatda 13 308 kishi koronavirus bilan kasallangan, ulardan 90 nafari vafot etgan va 13 218 kishi sog‘ayib ketgan.