Илон Маскнинг SpaceX космик компаниясига тегишли Starlink сунъий йўлдош интернет-лойиҳаси 2021 йил сентябрга келиб бутун дунёни узлуксиз ва бир маромдаги интернет билан таъминлай бошлаши кутилмоқда. Бу ҳақда SpaceX операцион директори Гвинн Шотвелл маълум қилди, деб ёзади Reuters.
«Биз, тахминан, 1800 та сунъий йўлдошни муваффақиятли жойлаштирдик ва улар операцион орбитага кириши биланоқ глобал узлуксиз интернет қамровига эга бўламиз, бу тахминан сентябрь ойига тўғри келади», — деди Шотвелл Macquarie Group технологик конференциясида
Унинг қўшимча қилишича, кейинчалик компания «ҳар бир мамлакатга кириш ва телекоммуникация хизматларини кўрсатиш бўйича музокаралар олиб бориш учун» назорат қилувчи органлар билан иш бошлайди.
Май ойида SpaceX асосчиси Илон Маск Starlink интернет хизматлари учун 500 мингдан зиёд олдиндан буюртма олганини айтганди.
2020 йил октябрь ойида SpaceX 11 мамлакат фойдаланувчилари орасида Starlink’нинг бета-синовини бошлади. Дастур қатнашчилари 499 долларга бир қатор ускуналар (терминал, уланиш мосламалари, йўриқнома) олган. Хизмат учун обуна тўлови ойига 99 доллар.
Маълумот учун, 2020 йил декабрида SpaceX Starlink лойиҳаси доирасида олис ва қишлоқ жойлар аҳолисини сунъий йўлдош интернет билан таъминлаш учун АҚШ ҳукуматидан 885,5 миллион доллар субсидияни қўлга киритди. Компания ушбу маблағни ўн йил давомида қабул қилади. Бундан ташқари, АҚШ ҳукумати SpaceX’га 35 та штатда 642 925 та нуқтада интернет тарқатиш хизматларини тақдим этиш учун қўшимча маблағ ҳам ажратади.
- Видео: SpaceX яна 60 та сунъий йўлдошни орбитага чиқарди. Улар бутун сайёрани интернет билан таъминлаш лойиҳасининг бир қисмидир
- SpaceX компанияси бортида рекорд даражада кўп сунъий йўлдош бўлган ракетани учиради
- Starlink’нинг илк фойдаланувчилари уни совуқ ҳаво ҳарорати ва қорли шароитда синовдан ўтказди. SpaceX’нинг сунъий йўлдош интернети бўрон вақтида ҳам йўқолмаган
Изоҳ (0)