Rossiyada koronavirusga qarshi emlanmagan davlat xizmatchilari uchun Moskva viloyati hukumat binosiga kirish taqiqlandi. Bu haqda viloyat hukumati raisining o‘rinbosari va sog‘liqni saqlash vaziri Svetlana Strigunkova ma’lum qildi.
“Biz o‘zimizdan boshladik. Oxirgi olti oy ichida emlanmagan yoki (koronavirus bilan) kasallangan davlat xizmatchilari va boshqa ishchilar uchun deyarli bugundan boshlab hukumat binosiga kirish taqiqlandi”, — deya xabar qoldirdi u koronavirusga qarshi kurash bo‘yicha Moskva viloyati tezkor shtabining Telegram kanalida.
21-iyun kuni Podmoskovyeda infeksiya yuqtirish bo‘yicha 1811 ta yangi holat aniqlandi. Mintaqa uchun bu pandemiya boshlanganidan buyon qayd etilgan kunlik rekord. Moskva viloyatida kasalxonaga yotqizishlar soni haftasiga 40 foizgacha o‘sib bormoqda. Hududda kuniga o‘rtacha mingdan ortiq bemor kasalxonalarga yuborilmoqda.
Italiyada haligacha koronavirusga qarshi emlanmagan tibbiyot xodimlari ishdan chetlashtirila boshlandi. Vaksinatsiyadan bosh tortgan tibbiyot xodimiga hamkasblari va bemorlari bilan aloqa talab etilmaydigan boshqa ish taklif qilinishi mumkin, ammo agar shunday ish o‘rni mavjud bo‘lsa. Aks holda bunday xodimlar 31-dekabrga qadar ish haqisiz ishdan chetlashtirilishi mumkin.Tegishli qoidalar 1-aprel kuni Italiya Vazirlar Kengashi tomonidan qabul qilingan koronavirusga qarshi kurash to‘g‘risidagi farmonda keltirilgan. Hujjat barcha tibbiyot xodimlari uchun majburiy vaksinatsiyani nazarda tutadi. Ushbu mas’uliyat davlat va xususiy tibbiy-ijtimoiy tuzilmalarda, shuningdek, dorixonalarda ishlaydigan sog‘liqni saqlash mutaxassislariga tegishli.
Ta’kidlanishicha, Italiyadagi professional uyushmalar va shifoxonalar ushbu sohadagi barcha shifokorlar, hamshiralar va boshqa ishchilarning ro‘yxatini taqdim etgan. Aprel oyida sog‘liqni saqlash idoralari ularning barchasiga vaksinatsiya hujjatlari, emlanishga kelishni tasdiqlash yoki vaksinadan voz kechishni qonuniylashtiradigan sabablarni taqdim etish uchun taklifnoma yuborgan. Ma’lum bo‘lishicha, taklifnoma olganlarning aksariyati vaksina olishga kelmagan.
Filippin prezidenti Rodrigo Duterte koronavirusga qarshi emlashni istamaganlarni zararkunandalar deb hisoblamoqda. U fuqarolarga ularni hibsga olish va majburiy ravishda emlash bilan tahdid qildi“Agar emlanishni istamasangiz, sizni hibsga olaman va vaksina dozasini yuboraman”, — degan Filippin prezidenti. “Sizlar zararkunandasiz, biz allaqachon aziyat chekyapmiz, siz esa vaziyatni og‘irlashtiryapsiz. Meni noto‘g‘ri tushunmang, lekin mamlakatda vaziyat inqirozli, favqulodda holat hukm surmoqda”, — deydi u.
Jons Hopkins universiteti ma’lumotlariga ko‘ra, Filippinda pandemiya boshlanganidan beri 1,4 million kishida COVID-19 qayd etilgan. Koronavirus tashxisi qo‘yilgan 23,7 ming kishi vafot etgan.
Izoh (0)