Olmoslar tarixidagi rekord: Botsvanada yirik qimmatbaho tosh topildi

Botsvanada og‘irligi chorak kilogrammga yetadigan olmos topildi. Bu hozirga qadar topilgan dunyoda kattaligi bo‘yicha uchinchi o‘rinda turuvchi qimmatbaho tosh hisoblanadi, deb xabar beradi “Korrespondent.net”. Mamlakat hukumati matbuot xizmatining ma’lum qilishicha, olmos iyun boshida topilgan, biroq uning taqdimoti endi amalga oshirilgan.

Qimmatbaho toshning og‘irligi 1098,3 qirotni tashkil etadi (219,6 gramm). U Botsvana shimolidagi Dvaneng konidan mahalliy hukumat va dunyodagi eng yirik olmos qazib oluvchi kompaniyalardan biri bo‘lgan De Beers’ning Debswana olmos kompaniyasi tomonidan topilgan.

“Olmosni sotishdan tushgan foyda mamlakatni milliy rivojlantirishga sarflanadi”, — deydi amaldorlar.

Ta’kidlanishicha, bunga qadar mamlakatda 1109 qirotli noyob olmos topilgan. Lesedi La Rona nomi berilgan olmos 53 million dollarga sotilgan edi.

Biroq jahon rekordi Kullinan olmosi tomonidan o‘rnatilgan bo‘lib, uning og‘irligi 3106 qirotga teng bo‘lgan. U 1905-yilda JARda topilgan. Hech qachon savdoga qo‘yilmagan olmosning narxi 2 milliardga teng. Kullinan Buyuk Britaniya qiroli Eduard VII ga sovg‘a qilingan va to‘qqizta yirik hamda 96 ta mayda brilliantlarga bo‘lingan. Ularning eng yirigi britan qirolligi tojidan o‘rin olgan.

Eslatib o‘tamiz, 2015-yilda Botsvanadagi kondan og‘irligi 1111 qirot keladigan olmos topilgandi — o‘shandan u olmos qazib olish tarixidagi eng yirik ikkinchi va so‘nggi 110 yilda topilgan eng yirik qimmatbaho toshga aylangan. 2019-yilning aprelida esa Botsvanada 1,7 ming qirotdan kattaroq olmos topilgan bo‘lib, u rekordni yangilagan — yanvarda uni Louis Vitton kompaniyasi sotib olgan.