18-iyun kuni kuzatilgan yog‘ingarchilik sabab Yaltadagi krokodilyariumni butunlay suv bosdi, deb xabar beradi Esquire. Oradan ikki kun o‘tgan bo‘lishiga qaramay, xodimlar suv toshqini oqibatlari bilan kurashishda davom etmoqda, shuningdek, ijtimoiy tarmoqlarga timsohlarni tutish jarayoniga oid roliklarni joylashtirib kelyapti.
Reptiliyalar saqlanuvchi krokodilyarium shahar markazidagi fermaning pastki qismida joylashgan. Ma’lum qilinishicha, sudralib yuruvchi yirtqich jonzotlar shaharga chiqib ketmagan, biroq krokodilyariumning butun hududi bo‘ylab tarqalgan.
“Bino butunlay suv ostida qolgan. So‘nggi soniyalarda deyarli barcha evakuatsiya qilindi”, — deydi krokodilyarium direktori Viktor Jilenko. Timsohlar saqlanadigan mazkur maskanning Instagram’dagi sahifasiga xodimlar tomonidan sudralib yuruvchilarning qo‘lga olinishi tasvirlangan foto va videolar joylashtirilmoqda.
https://www.instagram.com/p/CQUBl2gp9vJ/
“Ayrim jonzotlar Alushtinskiy akvariumiga, ba’zilari Yalta krokodilyariumi xodimlarining uylariga olib borildi. Buning uchun zudlik bilan zarur sharoit yaratilgan — hayvonlar vaqtincha vannalarda, balkonlardagi katta sig‘imli idishlarda yashamoqda”, — deyiladi muassasa saytida.
https://www.instagram.com/p/CQT9CAWJmfb/
Xodimlarning so‘zlariga ko‘ra, krokodilyariumda yashovchi jonzotlarga hech narsa qilmagan va ular sog‘lom.
Eslatib o‘tamiz, 17-iyun kuni Qrimda kuzatilgan kuchli yog‘ingarchilik oqibatida daryo o‘zanlari toshib ketgan. Ayniqsa, Kerch va Yaltaga jiddiy zarar yetgani aytilmoqda. Suv toshqinlari oqibatida bir kishi halok bo‘lgan, ikki kishi bedarak yo‘qolgan va 24 kishi jarohat olgan.
Izoh (0)