Namangan shahridagi “Orzu” mahallasida 120 o‘rinli “Saxovat” uyi qurib, foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
Prezident Shavkat Mirziyoyev 2021-yil 18—19-fevral kunlari viloyatga tashrifi chog‘ida Namangan shahridagi “Saxovat” uyida bo‘lib, bu yerdagi shart-sharoitlar bilan tanishgan va 1982-yilda qurilgan, sobiq paxta tozalash zavodining dala hovlisi bo‘lgan bino o‘rniga yangi majmua barpo etish topshirig‘ini bergan edi.
— 4 oy ichida Namangan shahrida “Saxovat” uyi uchun yangi bino qurib beriladi. Sizlar munosib sharoitlarda yashaysiz, davolanasiz, — degan edi davlat rahbari nuroniylar bilan suhbatda.
Oradan to‘rt oy o‘tdi va “Orzu” mahallasida zamonaviy majmua qurib bitkazildi.
Undan uch qavatli yotoq korpusi, to‘rtta kottej va boshqa inshootlar o‘rin oldi.
Kottejlarda har bir kishi uchun alohida xona ajratilgan bo‘lib, televizor, muzlatgich, dush va boshqa zarur vositalar bilan jihozlangan.
Kutubxona, muolaja va fizioterapiya xonalari, basseyn va trenajyor zali ham bu yerda yashovchilar uchun xizmat qiladi.
Shu paytgacha eski va moslashtirilgan binoda istiqomat qilib kelgan 14 nafar keksa va nogironligi bo‘lgan fuqaro yangi majmuaga ko‘chirib olib kelindi va olqishlar ostida ichkariga taklif etildi.
Ulardan biri — 73 yoshli Karim Yusupovni viloyat hokimi Shavkat Abdurazzoqovning o‘zi yetaklab, yangi xonasi tomon kuzatib qo‘ydi.
“Saxovat” uyi jamoasiga Prezident sovg‘asi — Isuzu avtobusi topshirildi.
Ma’lumot uchun, Namangandagi yangi “Saxovat” uyi qurilishi uchun 18 milliard so‘mdan ortiq mablag‘ sarflandi.
Izoh (0)