Наманган шаҳридаги «Орзу» маҳалласида 120 ўринли «Саховат» уйи қуриб, фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
Президент Шавкат Мирзиёев 2021 йил 18—19 февраль кунлари вилоятга ташрифи чоғида Наманган шаҳридаги «Саховат» уйида бўлиб, бу ердаги шарт-шароитлар билан танишган ва 1982 йилда қурилган, собиқ пахта тозалаш заводининг дала ҳовлиси бўлган бино ўрнига янги мажмуа барпо этиш топшириғини берган эди.
— 4 ой ичида Наманган шаҳрида «Саховат» уйи учун янги бино қуриб берилади. Сизлар муносиб шароитларда яшайсиз, даволанасиз, — деган эди давлат раҳбари нуронийлар билан суҳбатда.
Орадан тўрт ой ўтди ва «Орзу» маҳалласида замонавий мажмуа қуриб битказилди.
Ундан уч қаватли ётоқ корпуси, тўртта коттеж ва бошқа иншоотлар ўрин олди.
Коттежларда ҳар бир киши учун алоҳида хона ажратилган бўлиб, телевизор, музлатгич, душ ва бошқа зарур воситалар билан жиҳозланган.
Кутубхона, муолажа ва физиотерапия хоналари, бассейн ва тренажёр зали ҳам бу ерда яшовчилар учун хизмат қилади.
Шу пайтгача эски ва мослаштирилган бинода истиқомат қилиб келган 14 нафар кекса ва ногиронлиги бўлган фуқаро янги мажмуага кўчириб олиб келинди ва олқишлар остида ичкарига таклиф этилди.
Улардан бири — 73 ёшли Карим Юсуповни вилоят ҳокими Шавкат Абдураззоқовнинг ўзи етаклаб, янги хонаси томон кузатиб қўйди.
«Саховат» уйи жамоасига Президент совғаси — Isuzu автобуси топширилди.
Маълумот учун, Намангандаги янги «Саховат» уйи қурилиши учун 18 миллиард сўмдан ортиқ маблағ сарфланди.
Изоҳ (0)