O‘zbekistonda 2016-yil dekabridan 2021-yil mayiga qadar qancha shaxs fuqarolikka qabul qilingani ochiqlandi. Bu haqda AOKAda Ichki ishlar vazirligi mutasaddilari ishtirokida o‘tkazilgan matbuot anjumanida ma’lum qilindi.
“1991-yildan 2007-yilga qadar respublikamizda jami 482 nafar fuqaroligi bo‘lmagan shaxs O‘zbekiston fuqaroligiga qabul qilingan bo‘lsa, 2007-yildan 2016-yilning dekabr oyiga qadar bunday shaxslarga umuman fuqarolik berilmagan.
2016-yil dekabr oyidan 2021-yil may oyiga qadar Prezidentning 87 ta farmoni asosida 22 269 nafar shaxs mamlakatimiz fuqaroligiga qabul qilingan.
Davlat rahbarining 2020-yil 29-dekabrdagi Murojaatnomasida qator masalalar bilan birga, fuqarolikning yo‘qligi teng huquqlilik, ijtimoiy adolat tamoyillarining buzilishiga, qator ijtimoiy muammolarga olib kelishi qayd etilib, respublikamizda fuqarosizlikni qisqartirish bo‘yicha amalga oshirilayotgan tub islohotlarni izchil davom ettirish maqsadida 2005-yil 1-yanvarga qadar O‘zbekiston hududida doimiy yashash joyi bo‘yicha ro‘yxatga olingan, shuningdek, O‘zbekiston hududida uzluksiz 15 yil davomida doimiy yashash joyi bo‘yicha ro‘yxatda turib, fuqaroligi bo‘lmagan shaxs yashash guvohnomasi yoki identifikatsiya ID-kartasi asosida yashab turgan va chet davlat fuqaroligini qabul qilmagan fuqaroligi bo‘lmagan shaxslarni O‘zbekiston fuqarosi deb tan olish taklif etildi.
Shunga ko‘ra, ‘O‘zbekiston Respublikasining fuqaroligi to‘g‘risida’gi qonunga qo‘shimcha va o‘zgartirishlar kiritishga oid yangi qonun (2021-yilning 14-iyundagi O‘RQ–696-son) qabul qilindi”, — deyiladi xabarda.
Bundan avval O‘zbekistonda tug‘ilgan fuqaroligi bo‘lmagan shaxslarga fuqarolik berishda uzluksiz 5 yil yashash sharti talab etilmaydigan bo‘lgani hamda O‘zbekiston fuqaroligini olish va undan voz kechish jarayonlari onlayn rejimga o‘tkazilishi haqida xabar berilgandi.
Izoh (0)